დღეს დაესვა წერტილი იმ საკონსტიტუციო გატარიალებას, რომელიც დაწყებულია უკვე რამდენიმე კვირა თუ თვე,- ასე ეხმაურება საქართველოს პრეზიდენტი სალომე ზურაბიშვილი ევროკავშირთან დაკავშირებით „ქართული ოცნების“ გადაწყვეტილებას.

როგორც პრეზიდენტმა ცოტა ხნის წინ ორბელიანების სასახლეში გამართულ საგანგებო ბრიფინგზე აღნიშნა, „დღეს გამოუცხადა ამ არარსებულმა ხელისუფლებამ, არალეგიტიმურმა ხელისუფლებამ არა მშვიდობა, არამედ ომი საკუთარ ხალხს“.

„დღეს დაესვა წერტილი იმ მსვლელობას, რომელიც დაწყებული იყო რამდენიმე თვე თუ მეტი არა - ევროპიდან რუსეთისკენ. ყველა, ვისაც ჰქონდა რაღაც ეჭვი, რომ შეიძლება - „არა“, შეიძლება, მაინც რაღაც სხვა ახსნა არის, ყველა ეს ეჭვი გაიფანტა დღეს; დღეს გამოუცხადა ამ არარსებულმა ხელისუფლებამ, არალეგიტიმურმა ხელისუფლებამ არა მშვიდობა, არამედ ომი საკუთარ ხალხს, წარსულსა და მომავალს, იმიტომ, რომ ამ გზაზე არ არსებობს არც საქართველოს სახელმწიფოებრიობა, არც მისი დამოუკიდებლობა, არც მომვალი, გარდა რუსეთში...

მე დღეს დავიბარე დიპლომატიური კორპუსი და მათაც იგივე ვუთხარი. მათაც ვუთხარი, რომ ცოტა დააგვიანეს შეფასებები; ბევრ რაღაცას ელოდებოდნენ, რომ შეიძლება, რაღაც კიდევ არის დასამტკიცებელი. არაფერი აღარ არის დასამტკიცებელი და ეს კიდევ ერთხელ ვუთხარი მათ. ყველაფერი არის დამტკიცებული, ყველაფერი ნათელია. და თუ ვინმე არ ხედავს, რომ ნათელია - და ის მაინც რომ პუტინმა რამდენიმე წუთში გამოთქვა კმაყოფილება ამ ყველაფრის მიმართ და ხელისუფლებას დაუფასა თავისი მორჩილება, ეს მაინც არის მტკიცებულება, რაც ხდება.

მათ მივმართე და ვთხოვე, რომ ახლავე მიიღონ ყველა ის გადაწყვეტილება, რაც იყო ამდენხანს მისაღები და ჩვენ დაგვეხმარონ იმ ერთადერთ მოთხოვნაში, რაც არის ჩვენი და ხალხის, მთელი საზოგადოების მოთხოვნა - ახალი არჩევნების დანიშვნა და ჩატარება. ეს არის ჩვენი გამოსავალი და ეს არის ის, რისთვისაც ვიბრძვით.

ასევე, მე მოვიწვიე პოლიტიკური პარტიები, სხვადასხვა მოძრაობა, ვინც შეძლო აქამდე მოსვლა დღეს იმიტომ, რომ ვიცი, რომ ბევრი არასამთავრობო ორგანიზაცია უკვე არის ქუჩის აქციებში, ხალხი გამოდის სპონტანტურად, მე აქ მივმართე პოლიტიკურ პარტიებს, რომ ახლა დრო აღარ არის იმის, რომ „მე ჩემი აზრი მაქვს, ჩემი გზა მაქვს, ჩემი ხედვა მაქვს, ჩემი სურვილები მაქვს“. ეს ყველაფერი დამთავრდა. დღეს ამ გამოწვევის წინაშე ან ვართ ერთად, ან არ ვიქნებით. ჩვენი პასუხისმგებლობა იქნება. მე ვიქნები მათთან ერთად და თქვენთან ერთად იმდენად, რამდენადაც იქნებიან ერთიანნი, მიიღებენ ერთად კოორდინირებულ გადაწყვეტილებებს. არავინ არ სთხოვს პოლიტიკურ პარტიებს, რომ უცებ გახდნენ ერთი პარტია, ღმერთმა გვაშოროს ამისგან. აღარ გვინდა ერთპარტიული სისტემა და ამას ჩამოვშორდებით საბოლოოდ.

გვჭირდება დღეს გონივრული გადაწყვეტილებები, კოორდინირებულად მიღებული. ეს არის წინააღმდეგობის მოძრაობა და მე ვიქნები პრეზიდენტი ბოლომდე. მე ვარ ერთადერთი ლეგიტიმური ინსტიტუტი დღეს ამ ქვეყანაში; მე ვარ ერთადერთი ლეგიტიმური წარმომადგენელი ამ ქვეყნის; მე ვარ ერთადერთი, რომელსაც აქვს უფლება, დაელაპარაკოს მსოფლიოს ჩვენი საზოგადოების სახელით და მე ამას ვაპირებ. ბოლომდე ვიდგები აქ - თქვენთან და საზოგადოებასთან ერთად!“ - განაცხადა ზურაბიშვილმა.

შეგახსენებთ, დღეს, 28 ნოემბერს პრემიერ-მინისტრმა, ირაკლი კობახიძემ გაახმოვანა „ქართული ოცნების“ გადაწყვეტილება, რომლის მიხედვითაც, მიღებულია გადაწყვეტილება, რომ ევროკავშირთან მოლაპარაკებების გახსნის საკითხი 2028 წლის ბოლომდე დღის წესრიგში არ დადგება.

ავტორი: ექსპრესნიუსი,

სოციალური ქსელები

ბოკუჩავა: პრეზიდენტ სააკაშვილის პოსტი უცნაურია, მსგავსმა იმპულსურმა გადაწყვეტილებებმა მიგვიყვანა იქამდე, სადაც ვართ

ევროპარლამენტმა საქართველოზე კრიტიკული ანგარიში მიიღო

საქართველოში დიდი ბრიტანეთის ელჩი საგარეო უწყებაში დაიბარეს

სააკაშვილი: ჩემი თავმჯდომარეობის კანდიდატი არის ნანუკა ჟორჟოლიანი