"გირჩი - მეტი თავისუფლების" ლიდერის, ზურაბ ჯაფარიძის წინააღმდეგ მომხდარი ძალადობის ბრალდებით დაკავებული სოსო მაისურაძე სასამართლომ 2 000-ლარიანი გირაოს სანაცვლოდ გაათავისუფლა.

გადაწყვეტილება ცოტა ხნის წინ მოსამართლე გოგა კუპრეიშვილმა მიიღო.

დაცვის მხარის განცხადებით, მაისურაძის განწყობები რადიკალურად შეცვლილია და დანაშაულის გამეორების საფრთხე აღარ არსებობს.

"სასამართლომ სრულად გაიზიარა დაცვის მხარის არგუმენტები იმასთან დაკავშირებით, რომ მოცემულ ეტაპზე აღარ არსებობდა პატიმრობის გამართლების კანონიერი საფუძვლები და შესაბამისად, ბრალდებულს აღკვეთის ღონისძიებად შეფარდებული პატიმრობა შეუცვალა გირაოთი.

მან ჩემთან საუბარში დაადასტურა, რომ ეს იყო აღელვების ნიადაგზე მოქმედება, რომელსაც დადებითად არ აფასებს დღევანდელი გადმოსახედიდან. მისი განწყობები რადიკალურად არის შეცვლილი და რამე ახალი საფრთხე მსგავსი რამის გამეორებისა, არ არსებობს",- თქვა ადვოკატმა, ნოდარ ცინცაძემ.

რაც შეეხება ბრალდების მხარეს, პროკურორ ოთარ დოხნაძის განცხადებით, ბრალდებულისთვის გამამტყუვნებელი განაჩენის გამოტანას ითხოვდნენ.

"რაც შეეხება ჩვენს პოზიციას, ჩვენი პოზიცია არის იგივე, რაც იყო პირველივე წუთებიდან. ბრალდების მხარე მტკიცებულებების საფუძველზე მოითხოვდა გამამტყუვნებელი განაჩენის გამოტანას",- განაცხადა დოხნაძემ.

ცნობისთვის, 17 ივნისს, გორის მუნიციპალიტეტში, თბილისი-სენაკი-ლესელიძის საავტომობილო გზაზე მდებარე სუპერმარკეტის ავტოსადგომზე, სოსო მაისურაძემ პარტია „გირჩი - მეტი თავისუფლებას" დამფუძნებლის, ზურაბ ჯაფარიძის მიმართ ძალადობა განახორციელა. 

17 ივნისს, მაისურაძემ სოციალურ ქსელში დაწერა, რომ ჯაფარიძეს თავს პატრიარქისა და ეკლესიის "შეურაცხყოფისთვის" დაესხა. სამართალდამცველებმა აღნიშნული პირი იმავე დღეს დააკავეს.

მაისურაძეს ბრალდება საქართველოს სისხლის სამართლის კოდექსის 126-ე მუხლის 1-ელი ნაწილით წარუდგინეს (ძალადობა, რამაც დაზარალებულის ფიზიკური ტკივილი გამოიწვია), რაც სასჯელის სახედ და ზომად ერთ წლამდე თავისუფლების აღკვეთას ითვალისწინებდა.

ავტორი: ექსპრესნიუსი,

სოციალური ქსელები

აშშ-ის დაზვერვა: რუსეთმა დაიწყო კამპანია აშშ-ის არჩევნებში ჩარევის მიზნით

ევროკავშირი ოკუპირებულ ცხინვალში ჩატარებულ ე.წ. საპრეზიდენტო არჩევნებს არ აღიარებს

ჯანდაცვის სამინისტრო – ინფორმაცია, თითქოს კლინიკაში მოთავსებული ბაღის აღსაზრდელების ოჯახის წევრებს სამედიცინო მომსახურებისთვის გარკვეული თანხის გადახდა უწევთ, სიმართლეს არ შეესაბამება

კახა კალაძე სკოლის შენობის შესახებ: რამე რომ მოხდეს პასუხისმგებლობას ვინ აიღებს