ჯანდაცვის მინისტრის დავით სერგეენკოს ინფორმაციით, კონკრეტულ კლინიკებში, მწვავე ფსიქოზის მქონე პაციენტებს სტაციონარიდან დროზე ადრე წერდნენ და ეს ხდებოდა იმის გამო, რომ კლინიკებს ზედმეტი თანხა გამოეწერათ.

ამის შესახებ სერგეენკომ ჟურნალისტებს  ზოგიერთი ფსიქიატრიული კლინიკისთვის დაფინანსების შემცირების საკითხზე კომენტირებისას  განუცხადა.

„მწვავე შემთხვევების მართვის დროს, როდესაც ქრონიკული დაავადება მწვავდება, პაციენტი აბსოლუტურ შემთხვევაში საჭიროებს სტაციონარში მკურნალობას. ჩვენმა მონიტორინგმა უტყუარად დაადგინა, რომ კლინიკები არც თუ ისე იშვიათ შემთხვევაში, მწვავე ფსიქოზის მქონე პაციენტს სტაციონარიდან დროზე ადრე წერდნენ, ის ერთი თვის განმავლობაში განმეორებით ან განმესამებით შედიოდა იგივე ან სხვა კლინიკაში, ეს ხდებოდა იმისათვის, რომ ამ კლინიკებს ზედმეტი თანხა გამოეწერათ და ამას პაციენტის უსაფრთხოების ხარჯზე აკეთებდნენ. მწვავე ფსიქოზის დროს პაციენტს განსაკუთრებული მოვლა და მკურნალობა სჭირდება. სამწუხაროდ ამ ყველაფრის უკან რეალურად ფინანსური ინტერესები დგას, მათ შორის იმ კლინიკების, რომლებიც ბოლო პერიოდში ყველაზე მეტს ხმაურობენ“,- განაცხადა დავით სერგეენკომ.

მისივე განმარტებით, ფსიქიკურ ჯანმრთელობასთან დაკავშირებით ბოლო პერიოდში განვითარებული მოვლენებისას ადამიანთა სამი ჯგუფი გამოიკვეთა.

„ერთი- ადამიანები, რომლებიც ამ პაციენტებს რეალურად გულშემატკივრობენ, თუმცა ყველა დეტალში არ არიან ჩახედულნი. ჩვენ მათ სიამოვნებით გავარკვევთ სიტუაციაში. მეორე - ადამიანები, რომლებსაც გარკვეული ხეირი აინტერესებთ და მესამე - პოლიტიკურად ანგაჟირებული ადამიანები, რომლების მიზანიც ნეგატივის წამოწევაა. რაც შეეხება პროგრამას, რომელიც არის დამტკიცებული - ცვლილებები, რომელიც გატარდა მხოლოდ პაციენტების ინტერესებისკენ იყო მომართული და ეს ცვლილებები არ იქნება ბოლო“,- განაცხადა დავით სერგეენკომ.

შეგახსენებთ, ჯანდაცვის სამინისტრომ ფსიქიატრიულ კლინიკებს სახელმწიფო დაფინანსება შეუმცირა.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

პაპუაშვილი - პარლამენტში პარტია „საქართველოსთვის“ სახელით მყოფი ხალხი უნდა მიხვდეს, რომ გაქცეული გახარია ამათ დასცინის

ბენზინის დეფიციტის გამო, რუსეთი თვითმფრინავებისთვის საწვავის პრობლემებია

ორწლიანი პაუზის შემდეგ თელ-ავივში მასშტაბური გეი აღლუმი გაიმართა

ხოშტარია: ვმუშაობდი და გავაგრძელებ მუშაობას „მოღალატე რუსების“ წინააღმდეგ სანქციებზე