საქართველოს სტატისტიკის ეროვნულმა სამსახურმა 2025 წლის მთლიანი შიდა პროდუქტის (მშპ) წინასწარი მონაცემები დააზუსტა. განახლებული მონაცემებით, გასულ წელს საქართველოს ეკონომიკა 8.4%-ით გაიზარდა, მაშინ როდესაც მარტში გამოქვეყნებული წინასწარი შეფასებით ზრდის მაჩვენებელი 7.5% იყო.

საქსტატის მონაცემებით, გადახედვის შედეგად, 2025 წლის მშპ-ის მოცულობა მიმდინარე ფასებში 104.6 მილიარდი ლარიდან 108.4 მილიარდ ლარამდე გაიზარდა. შესაბამისად, ნომინალური მშპ-ის მოცულობა თავდაპირველ შეფასებას 3.8 მილიარდი ლარით აღემატება, ხოლო წლიურმა ზრდამ 16.6% შეადგინა.

ეკონომიკური ზრდის ტემპის გადახედვა ეკონომიკის არაერთ სექტორში დამატებული ღირებულების მაჩვენებლების დაზუსტებას უკავშირდება. მათ შორის, ყველაზე მნიშვნელოვანი ცვლილება ვაჭრობის სექტორში დაფიქსირდა, რომლის რეალური ზრდის მაჩვენებელი 3.8%-დან 7.5%-მდე გაიზარდა. სოფლის, სატყეო და თევზის მეურნეობაში წინასწარი შეფასებით არსებული 5.7%-იანი კლება 0.8%-იან ზრდად გადაიხედა, საფინანსო და სადაზღვევო საქმიანობებში კი ზრდის მაჩვენებელი 12.9%-დან 15.9%-მდე გაიზარდა.

ზრდის ტემპი დაზუსტებული მონაცემებით უფრო მაღალი აღმოჩნდა ტრანსპორტისა და დასაწყობების სექტორში (10.8%, ნაცვლად 8.9%-ისა), განთავსებისა და საკვების მიწოდების საქმიანობებში (8.7%, ნაცვლად 5.6%-ისა), უძრავ ქონებასთან დაკავშირებულ საქმიანობებში (6.5%, ნაცვლად 5%-ისა) და მშენებლობაში (2.5%, ნაცვლად 0.8%-ისა). ინფორმაციისა და კომუნიკაციის სექტორში, რომელიც კვლავ ერთ-ერთი ყველაზე სწრაფად მზარდი მიმართულებაა, ზრდა 28.7%-დან 28.9%-მდე გადაიხედა.

რაც შეეხება მშპ-ის ნომინალურ მოცულობას, ყველაზე დიდი მატება მშენებლობის სექტორში დაფიქსირდა. დარგის დამატებული ღირებულება თავდაპირველ შეფასებასთან შედარებით 1.1 მილიარდი ლარით გაიზარდა და 8.4 მილიარდ ლარს მიაღწია. ვაჭრობის სექტორის მაჩვენებელი 725.2 მილიონი ლარით, დამამუშავებელი მრეწველობის კი 564.3 მილიონი ლარით გაიზარდა.

ამასთან, ყველა სექტორში მაჩვენებლები ზრდის მიმართულებით არ შეცვლილა. მაგალითად, განათლების სექტორის დამატებული ღირებულება 328.6 მილიონი ლარით, ჯანდაცვისა და სოციალური მომსახურების საქმიანობების კი 144.5 მილიონი ლარით შემცირდა თავდაპირველ შეფასებასთან შედარებით.

საქსტატმა ასევე განაახლა მშპ ერთ მოსახლეზე გაანგარიშება. 2025 წლის დაზუსტებული მონაცემებით, ეს მაჩვენებელი 27 546.9 ლარს შეადგენს, მაშინ როდესაც მარტში გამოქვეყნებული წინასწარი შეფასებით 28 235.4 ლარი იყო. აშშ დოლარში გამოსახული მშპ ერთ მოსახლეზე კი 10 045.5 დოლარით განისაზღვრა, წინასწარი შეფასებით არსებული 10 296.5 დოლარის ნაცვლად.

საქსტატის განმარტებით, ერთ მოსახლეზე მშპ-ის მაჩვენებლების ცვლილება უკავშირდება 2024 წლის მოსახლეობის აღწერის შედეგების საფუძველზე 2015-2025 წლების მოსახლეობის რიცხოვნობისა და ძირითადი დემოგრაფიული მაჩვენებლების გადაანგარიშებას. აღნიშნულის შედეგად, ეროვნულ ანგარიშებში ერთ მოსახლეზე მაჩვენებლები 2015 წლიდან განახლდა.

აღსანიშნავია, რომ მშპ-ის რეალური ზრდის მაჩვენებლის 8.4%-მდე გადახედვის პარალელურად, მშპ-ის დეფლატორის ზრდაც შეიცვალა. თუ წინასწარი შეფასებით ის 4.6% იყო, დაზუსტებული მონაცემებით 7.5% შეადგინა. სწორედ რეალური ზრდისა და ფასების დონის ცვლილების ერთობლიობა აისახა ნომინალური მშპ-ის განახლებულ მოცულობაში.

ავტორი: მარიამ იმერლიშვილი, ექსპრესნიუსის რეპორტიორი 2020 წლიდან

სოციალური ქსელები

ვატო ყიფიანს, შოთა ყიფიანს, ავთანდილ ბილანიშვილს, პავლე გოცირიძეს და დავით კაჭარავას, ფეიქრიშვილზე თავდასხმის ფაქტზე ბრალი წაუყენეს

პროკურატურამ პენიტენციური სამსახურის ყოფილ გენერალურ დირექტორს და №8 პენიტენციური დაწესებულების ყოფილ დირექტორს ფეიქრიშვილის საქმეზე ბრალი წაუყენა

პაპუაშვილი – ფაშისტური რეჟიმის შემქმნელები ნიურბერგის პროცესზე ამტკიცებდნენ, რომ ცალკეული გადაცდომები იყო და ეს სახელმწიფო პოლიტიკა არ ყოფილა, ამას ერთ-ერთში „ნაცმოძრაობა“ იმეორებს

საქსტატმა 2025 წლის ეკონომიკურ ზრდას გადახედა და 7.5%-დან 8.4%-მდე გაზარდა - რის საფუძველზე?