საქართველოს პროკურატურამ ქვეყნის ინტერესებისთვის საზიანო ჯაშუშობის საქმესთან დაკავშირებით დაკავებულ ორ მოქალაქეს ბრალი წაუყენა.

უწყების ცნობით, საქართველოს სახელმწიფო უსაფრთხოების სამსახურის კონტრდაზვერვის დეპარტამენტის მიერ ჩატარებული გამოძიებით დადგინდა, რომ საქართველოს ორი მოქალაქე, ფინანსური სარგებლის მიზნით უცხოური დაზვერვის სამსახურების დავალებით მოქმედებდა და სისტემატურად აგროვებდა და გადასცემდა მათ სხვადასხვა ტიპისა და კატეგორიის ინფორმაციას.

ასევე აღინიშნა, რომ ერთ-ერთმა ბრალდებულმა მიღებული თანხების ნაწილი გადასცა დაზვერვის შეგროვებაში ჩართულ სხვა პირებს.

ბრალდება წაყენებულია საქართველოს სისხლის სამართლის კოდექსის 314-ე მუხლის პირველი ნაწილით - ჯაშუშობა - რაც ითვალისწინებს 12 წლამდე თავისუფლების აღკვეთას.

პროკურატურამ განაცხადა, რომ კანონით დადგენილ ვადაში სასამართლოს მიმართავს წინასწარი პატიმრობის შეფარდების შუამდგომლობით.

შეგახსენებთ, რომ საქართველოს სახელმწიფო უსაფრთხოების სამსახურმა 30 მაისს განაცხადა, რომ ჯაშუშობის საქმესთან დაკავშირებით ორი პირი დააკავეს. მათი ვინაობა თავდაპირველად არ სახელდება.

მოგვიანებით გაირკვა, რომ დაკავებულთაგან ერთ-ერთი გულბაატ რცხილაძე იყო, რომელიც, გამომძიებლების თქმით, დაკავშირებული იყო ორი უცხო ქვეყნის სადაზვერვო სამსახურებთან და სავარაუდოდ, პარალელურ სადაზვერვო საქმიანობას ახორციელებდა.

მეორე დაკავებულია ირაკლი ჩიხლაძე, 2008 წელს მოკლული ჟურნალისტ გიგა ჩიხლაძის ძმა. გამომძიებლების თქმით, ის უცხოური სადაზვერვო სამსახურის სახელით კოორდინაციას უწევდა რამდენიმე პირის ქსელს, მართავდა მათ საქმიანობას და უზრუნველყოფდა ინფორმაციის შეგროვებასა და გადაცემას.

ავტორი: ექსპრესნიუსი,

სოციალური ქსელები

ტრამპი: რუსეთი დათანხმდა დაპატიმრებული ამერიკელი საზღვაო ქვეითის გაცვლის გარეშე გათავისუფლებას

გერმანია განიხილავს რუსეთში დრონების მწარმოებლების წინააღმდეგ კიბერშეტევების განხორციელების ნებართვის მინიჭებას

ნასვამი და ნარკოტიკული თრობის ქვეშ მყოფი მძღოლების წინააღმდეგ ბრძოლა მკაცრდება - სტრატეგია

უკანა სავარძელზე ღვედი და სკოლამდელი ბავშვებისთვის სპეცსავარძლების გამოყენება სავალდებულო გახდება