როგორც გახსოვთ, რამდენიმე დღის წინ მე მოსალოდნელ პროვოკაციებთან დაკავშირებით ბრიფინგი ჩავატარე. ერთ-ერთი პუნქტი, რაც მე მაშინ მოვუყევი წინასწარ საზოგადოებას, იყო გავრცელებული ინფორმაცია, რომელიც მოდიოდა „ნაცმოძრაობიდან“ , რომ ისინი აპირებდნენ ადამიანების მოსყიდვას საიმისოდ, რომ შემდეგ მომხდარიყო ვიდეოკადრების გავრცელება,- ამის შესახებ „ქართული ოცნების“ აღმასრულებელმა მდივანმა, მამუკა მდინარაძემ ბრიფინგზე განაცხადა.

როგორც მან აღნიშნა, „სქემა იყო „ქართული ოცნებიდან“ ვინმეს მოსყიდვა, რომელიც შემდეგ ან სხვას დაარწმუნებდა, ან თავად ჩაყრიდა ბიულეტენებს  და ამის ვიდეოკადრები გავრცელდებოდა, რაც არჩევნების ლეგიტიმაციას კითხვის ნიშნის ქვეშ დააყენებდა“.

„სქემა იყო ასეთი, რომ უნდა მოესყიდათ, უნდა მოეძებნათ ვინმე „ქართული ოცნების“ რიგებში, ვისაც გადაუხდიდნენ ფულს, რომელიც შემდეგ სხვას დაარწმუნებდა, ან თვითონ გააკეთებდა ამას, რომ ჩაყრიდა ან შეაცურებდა ბიულეტენებს, საარჩევნო ურნაში ან ელექტრონულ აპარატში და ამას შემდეგ გადაიღებდა ვინმე კვლავ ნაცმოძრაობიდან და ეს ვიდეოკადრები გავრცელდებოდა და იქნებოდა ბუნებრივია ასეთი პროვოკაცია დადგმული. ერთი-ერთში, როგორც იმ დღეს ვილაპარაკე, ერთი-ერთში დადასტურდა, თუ ის კადრები ნამდვილია, რაც ვრცელდება მარნეულიდან, ჩვენ ამის მოკვლევას კიდევ ვატარებთ, დავასწრებთ მოვლენებს, თუ ეს კადრები ნამდვილია, პირობას ვაძლევ, რომელი პარტიის ან რომელი, არ ვიცი, „ენჯეოსექტორი“ იქნება თუ ვინც არ უნდა იყოს, ეს ჩვენი იქნება თუ სხვისი არ აქვს მნიშვნელობა, რომელი პარტიის წარმომადგენელიც არ უნდა იყოს, დაისჯება უმკაცრესად ნებისმიერი ადამიანი, რომელიც ამ სქემაში მიიღებს მონაწილეობას. წარმოუდგენელია, მთელი პასუხისმგებლობით ვამბობ, რომ კამერების წინ დადგეს ადამიანი, ნახევარ თუ ერთ მეტრში კამერა უღებდეს და ასე ყრიდეს იმ უბანზე, სადაც არ არის ელექტრონული არჩევნები და ასეთი რამდენიმე ათეული უბანია ქვეყანაში მხოლოდ, წარმოუდგენელია, რომ კამერის წინ ასე ყრიდეს და იცოდეს, ხედავდეს, შეუძლებელია, რომ ვერ ხედავდეს, ეს ერთი. ანუ, ეს არის სპეციალურად გაკეთებული“,-  განაცხადა მდინარაძემ.

მისივე თქმით, „ადამიანი, რომელიც გავრცელებულ კადრებში ჩანს, მონაწილეობს ქვეყნის არევის გეგმაში, თუმცა, ამ სპექტაკლებით არჩევნების ლეგიტიმაციას პრობლემას ვერავინ შეუშლის“. 

„სამწუხაროდ, თუ ეს კადრები ნამდვილია და ახალია, იქ მონაწილეობას იღებს „ქართული ოცნების“ დეპუტატი საარჩევნო უბანზე და იმის გამო, რომ ჩვენი ღრმა რწმენით, მე პირადად დარწმუნებული ვარ ამაში, ის იღებს მონაწილეობას ქვეყნის არევის გეგმაში, რომ ეს კადრები გავრცელდეს და შემდეგ ლეგიტიმაციის პრობლემები იყოს.

ვერავინ ვერ შეუქმნის პრობლემას ასეთი დადგმული სპექტაკლებით, რომელშიც სამწუხაროდ, იღებს ადამიანი მონაწილეობას, რომელმაც ჩაიდინა პირდაპირ მავნებლობა, საქართველოს სახელმწიფოს და მისი კონსტიტუციური წყობის და უსაფრთხოების წინააღმდეგ, შესაბამისად პირობას ვაძლევთ ყველას და დარწმუნებული ვარ ეს იქნება დამოკიდებულება სამართალდამცველების და სამართალდამცავი ორგანოების დაისჯება უმკაცრესად  ყველა, ეს ის ადამიანი იქნება თუ ყველა სხვა კიდევ მომავალში დღის განმავლობაში ამას მოიფიქრებს იმიტომ, რომ ეს არის საბოტაჟი პირდაპირი გაგებით, აქედან გამომდინარე, სრული პასუხისმგებლობით ვამბობ და მოვუწოდებ ყველა ადამიანს, ვისაც კიდევ შეიძლება ჰქონდეს განზრახული ასეთ სპექტაკლებში, ასეთ სიბინძურეში, მდაბიო ფეიკების დადგმაში, მოვუწოდებ და მიაწვდინეთ ყველას ხმა, ვინც არ არის ტელევიზორთან, ვინც არ არის სოციალურ ქსელთან  გაავრცელეთ მაქსიმალურად, ყველას ვთხოვ, მოგიწოდებთ ჟურნალისტებს, რომ მიწვდინონ ყველას ხმა , რომ  თუ მსგავს დანაშაულში ხაზგასმით ვამბობ - დანაშაულში მიიღებენ მონაწილეობას,  მათი დამცველი არ იქნება არავინ და მითუმეტეს არც ჩვენ, ისინი დაისჯებიან კანონის მთელი სიმკაცრით“,- განაცხადა მდინარაძემ.

ავტორი: ექსპრესნიუსი,

სოციალური ქსელები

აშშ-ის საზღვაო ძალებმა ირანის საზღვაო ბლოკადა დაასრულეს

მოსკოვის ნავთობგადამამუშავებელი ქარხანა კიდევ უფრო დაზიანდა ერთი კვირის განმავლობაში მეორეჯერ თავდასხმის შედეგად.

დიდმა ბრიტანეთმა, გერმანიამ და ნატოს კიდევ ხუთმა ქვეყანამ უკრაინას ასობით მილიონი დოლარის ღირებულების დრონებისა და რაკეტების ახალი მიწოდება დაჰპირდნენ

ცოლის ინფორმაციით, ბაქოს სააპელაციო სასამართლომ აფგან სადიგოვი პატიმრობაში დატოვა