ოკუპირებული ცხინვალის ე.წ. საგარეო - ველით, ნაბიჯი, რომელიც ადასტურებს ივანიშვილის კეთილ ზრახვებს, სამართლებრივად სავალდებულო გახდება

2024-09-18 14:26:05, 324 ნახვა

პოლიტიკა

ჩვენ ველით, რომ ეს რეალური ნაბიჯი, რომელიც ადასტურებს ბ-ნი ივანიშვილის მიერ გამოთქმული კეთილი ზრახვების გულწრფელობას, უახლოეს მომავალში გახდება სამართლებრივად სავალდებულო, დოკუმენტირებული უარი საქართველოს მხრიდან სამხრეთ ოსეთის რესპუბლიკისა და აფხაზეთის წინააღმდეგ ძალის გამოყენების შესაძლებლობაზე, ან მუქარაზე,- ასე ეხმაურება დროებით ოკუპირებული ცხინვალის რეგიონის ე.წ. საგარეო საქმეთა სამინისტრო "ქართული ოცნების" საპატიო თავმჯდომარის, ბიძინა ივანიშვილის განცხადებას.

როგორც ე.წ. საგარეო უწყების 17 სექტემბრით დათარიღებულ განცხადებაშია აღნიშნული, ე.წ. სამხრეთ ოსეთის "განვითარების პოლიტიკური ვექტორი ისტორიულად შეგნებული არჩევანია, რომელიც რუსეთის ფედერაციასთან მოკავშირე და ინტეგრაციული კავშირების ყოვლისმომცველი გაძლიერების აუცილებლობით არის განპირობებული".

"როგორც მოსალოდნელი იყო, საქართველოში, მმართველი "ქართული ოცნების" საპატიო თავმჯდომარის, ბიძინა ივანიშვილის განცხადებებს, 2008 წლის აგვისტოში სამხრეთ ოსეთის რესპუბლიკის წინააღმდეგ განხორციელებული შეიარაღებული აგრესიის გამო, ოსი ხალხისთვის ბოდიშის მოხდის აუცილებლობის შესახებ, პრემიერ-მინისტრ ირაკლი კობახიძის განცხადება მოჰყვა, რომელმაც აღნიშნა, რომ ამის გაკეთებას არავინ აპირებს.

აღსანიშნავია, რომ ბატონი კობახიძის პოზიცია, რომელიც სამხრეთ ოსეთის მშვიდობიანი მოსახლეობის წინააღმდეგ მებრძოლ თანამემამულეებს გმირებად თვლის, ხოლო ოსებს, რომლებიც თავიანთ მიწას იცავდნენ, მკვლელებად, სრულად შეესაბამება საქართველოში არსებული რეალური მდგომარეობის დამახინჯებულ გაგებას.

საქართველოში, საპარლამენტო არჩევნების წინა პერიოდში, ქართულ-ოსური ურთიერთობების თემა, ასე თუ ისე, გამოყენებული იქნება შიდაპოლიტიკურ საარჩევნო ბრძოლაში. თუმცა, ურთიერთობების დამყარების პერსპექტივა არ შეიძლება, დამოკიდებული იყოს კონკრეტულ მომენტში საქართველოში არსებულ პოლიტიკურ ვითარებაზე.

სამწუხაროდ, ოსი ხალხის ისტორიაში ძალიან ბევრი სისხლიანი ლაქა და მოუშუშებელი ჭრილობა დატოვეს საქართველოს პოლიტიკამ და ქართველმა პოლიტიკოსებმა 1920, 1989-2004 და 2008 წლებში.

ჩადენილი ქმედებების გაგების გარკვეული ტენდენცია, რომელიც დღეს საარჩევნო პროცესის ლოგიკის კონტექსტშია გადმოცემული, როგორც ჩანს, მომავალში პრაქტიკულ ზომებს გულისხმობს.

სამხრეთ ოსეთის განვითარების პოლიტიკური ვექტორი ისტორიულად შეგნებული არჩევანია, რომელიც განპირობებულია რუსეთის ფედერაციასთან მოკავშირე და ინტეგრაციული კავშირების ყოვლისმომცველი გაძლიერების აუცილებლობით, რომელიც არის რეგიონში მშვიდობისა და უსაფრთხოების გარანტი და რომლის ტერიტორიაზეც გაყოფილი ოსი ხალხის უმრავლესობა ცხოვრობს",- აღნიშნულია ე.წ. საგარეო საქმეთა სამინისტროს განცხადებაში.

შეგახსენებთ, 14 სექტემბერს, "ქართული ოცნების" საპატიო თავმჯდომარე ბიძინა ივანიშვილმა გორში მოსახლეობასთან შეხვედრისას ოკუპაციაზე ისაუბრა და აღნიშნა: "26 ოქტომბრის არჩევნების დასრულებისთანავე, როდესაც ომის გამჩაღებლები გასამართლდებიან, როდესაც უკლებლივ ყველა დამნაშავე ქართულ-ოსური ძმობისა და თანაცხოვრების დანგრევისთვის უმკაცრეს სამართლებრივ პასუხს მიიღებს, ჩვენ აუცილებლად გამოვძებნით საკუთარ თავში ძალას, რათა ბოდიში მოვიხადოთ იმის გამო, რომ დავალების შესაბამისად, მოღალატე "ნაციონალურმა მოძრაობამ" 2008 წელს ცეცხლის ალში გახვია ჩვენი ოსი დები და ძმები".

ავტორი: ექსპრესნიუსი,