აღმაშენებლის ხეივანში ერთი ადამიანი მოკლეს, ერთი კი დაჭრილია

2016-02-16 17:07:47, 798 ნახვა

სამართალი

აღმაშენებლის ხეივანში ბენზინგასამართ სადგურზე მომხდარ შემთხვევას ერთი პირის სიცოცხლე ემსხვერპლა.

შინაგან საქმეთა სამინისტროს ცნობით, კიდევ ერთი ადამიანი დაჭრილია. შემთხვევა აღმაშენებლის ხეივანში მოხდა, სადაც ქუჩურ გარჩევაში რამდენიმე ახალგაზრდა მონაწილეობდა. როგორც თვითმხილველები ყვებიან, სიტყვიერ დაპირისპირებას რამდენიმე გასროლა მოჰყვა, რის შედეგადაც ერთი ახალგაზრდა გარდაიცვალა, მეორე კი დაიჭრა. ისინი ძმები არიან.

ინციდენტში მონაწილე პირები დიღმის ტყისკენ გაიქცნენ, თუმცა პოლიციამ ერთ-ერთი მათგანი უკვე დააკავა. ადგილზე ამ დრომდე კრიმინალისტები მუშაობენ და ინციდენტში მონაწილე სხვა პირების დაკავების ოპერაცია მიმდინარეობს.

როგორც "ექსპრესნიუსს" შინაგან საქმეთა სამინისტროს საზოგადოებასთან ურთიერთობის სამსახურში განუცხადეს, საქმე განზრახ მკვლელობის მცდელობის ფაქტზე "სისხლის სამართლის კოდექსის" 108-ე მუხლით მიმდინარეობს, რაც თავისუფლების აღკვეთას 7-დან 15 წლამდე ითვალისწინებს.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან