შუახევში, ღია სივრცე საზოგადოებისთვის ,,ქალთა ოთახის“ მიზნობრივი პროგრამის ფარგლებში გამარჯვებულ მონაწილეებთან ხელშეკრულებები გაფორმდა

2021-09-14 15:27:09, 1209 ნახვა

რეგიონი

ხელშეკრულებას ხელი მუნიციპალიტეტის მერის მოადგილე რუსუდან შავაძემ და გამარჯვებულმა კონკურსანტებმა მოაწერეს.

პროექტი წელს მეორედ ხორციელდება და ადგილობრივი ბიუჯეტიდან 10 500 ლარით დაფინანსდა.

პროექტში გამარჯვებულმა მონაწილეებმა კონკურსის ოთხი ეტაპი გაიარეს. წარმოდგენილ პროექტებს შესაბამისი კომისია სწავლობდა, რომელიც, როგორც ადგილობრივი წარმომადგენლებისგან, ასევე არასამთავრობო ორგანიზაციებისგან იყო დაკომპლექტებული.

პროექტში გამარჯვებული თამუნა ქარცივაძე ლაზერული ჭრის და გრავირების დანადგარს შეიძენს ხელნაკეთი დეკორაციების ორიგინალური და განსხვავებული ნივთების შესაქმნელად. დალი ტარიელაძე მცირე საოჯახო მეურნეობის ხელშეწყობის მიზნით, ხილის საშრობ დანადგარს, ხოლო მაყვალა მიქელაძე მცირე ფერმერული მეურნეობის განვითარებისთვის, ინკუბატორის დანადგარს შეიძენს.

პროგრამის მიზანია მუნიციპალიტეტში მცხოვრები ქალების სოციალური და ეკონომიკური გაძლიერება, გააქტიურება, სოფლად მიგრაციის შეჩერების ხელშეწყობა, ქალების მეტი ჩართულობისა და აქტიურობის გაზრდა საზოგადოებრივ ცხოვრებაში.