„მას შემდეგ, რაც ტურიზმის ინდუსტრია ძალიან დიდი გამოწვევის წინაშე დადგა, პირადად მე, მთელი ჩვენი გუნდი პრემიერ-მინისტრის დავალებით, რეგიონებში დავდივართ და ვხვდებით სექტორს, განსაკუთრებით იმ ტურისტული მიზიდულობის ადგილებში, ვისაც ყველაზე დიდი რისკი დაუდგა, - ამის შესახებ ეკონომიკისა და მდგრადი განვითარების მინისტრმა ნათია თურნავამ ქუთაისში, მცირე და საოჯახო სასტუმროების მფლობელებთან შეხვედრის დასრულების შემდეგ ჟურნალისტებთან საუბრისას განაცხადა.

მინისტრის თქმით, ტურიზმის ინდუსტრია წლის ბოლომდე 1 მილიონ რუს ტურისტს ელოდებოდა, თუმცა ახლა მათი ჩამოსვლის საკითხი კითხვის ნიშნის ქვეშ დადგა.

ნათია თურნავას განცხადებით, სხვა რეგიონებში ბოლო დროს გამართული შეხვედრების მსგავსად, ქუთაისში გამართული შეხვედრის მიზანი  იყო, ადგილობრივი ტურისტული ბიზნესისგან მოესმინა მათი მოთხოვნები, რათა სხვადასხვა ქალაქებსა და სოფლებში გამართული შეხვედრების შედეგების შეჯამება და შემდგომი სამოქმედო გეგმის შემუშავება მოხდეს.

„მოთხოვნები სამი მიმართულებით ისმის: პირველი მოთხოვნაა, რომ მოხდეს სტაბილიზაცია, იყოს მშვიდობა და ამის შესახებ მესიჯი კიდევ ერთხელ მივაწოდოთ მთელ მსოფლიოს - რომ საქართველო იყო, არის და იქნება უსაფრთხო ადგილი ტურიზმისთვის. მეორე მიმართულებაა ფინანსური პრობლემები, რაც ბიზნესს დაუდგა, ესაა ბანკის სესხები, სხვადასხვა გადასახადები, ის შემოსავალი, რომელსაც ისინი მიიჩნევდნენ, რომ მიიღებდნენ ამ სეზონზე და რომელიც შეიძლება ვერ მიიღონ ამ გართულებული ვითარების გამო. მესამე მიმართულება,  რომელიც ძალიან მკაფიოდ გამოიკვეთა - ბიზნესი, სასტუმროები, ოჯახები ითხოვენ, რომ დივერსიფიკაციასა და სხვა მიმართულებებზე მუშაობასთან ერთად მაქსიმუმი გავაკეთოთ, რომ მათ შორის რუსი ტურისტიც არ წავიდეს ქვეყნიდან და ჩვენს ბაზარზე შევინარჩუნოთ", - განაცხადა ნათია თურნავამ.

ეკონომიკის მინისტრის თქმით, სწორედ ეს სამი მიმართულებაა ის დავალება, რომელიც მოდის ტურიზმის ინდუსტრიიდან, მცირე სასტუმროებისგან, ტუროპერატორებისგან და  რიგითი ადამიანებისგან და მთავრობა, ეკონომიკის სამინისტრო  აქტიურად მუშაობს მათ მოგვარებაზე.

(NS)

ავტორი: ექსპრესნიუსი,

სოციალური ქსელები

რუსი ჟურნალისტი და ბლოგერი იური დუდი ტერორისტებისა და ექსტრემისტების სიაში დაამატეს

RBC-Ukraine: აზერბაიჯანმა და თურქეთმა მხარი დაუჭირეს ევროკავშირის სანქციების მოხსნას რუსი მილიარდერის, უსმანოვის წინააღმდეგ

პენიტენციური სამსახურის გენერალური დირექტორი ოჯახის განცხადებას, რომ მსჯავრდებულ გიორგი დავითაძეზე სისტემატური ძალადობა ხორციელდება, სიცრუეს უწოდებ

რუბიომ და ლავროვმა თითქმის ერთი საათის განმავლობაში განიხილეს უკრაინა და აშშ-რუსეთის ურთიერთობები