20-21 ივნისის მოვლენებისას დაკავებული მოქალაქეები გაათავისუფლეს

2019-06-26 11:55:04, 1705 ნახვა

სამართალი

რუსთაველის გამზირზე 20-21 ივნისს განვითარებული მოვლენებისას ადმინისტრაციული წესით დაკავებული ყველა პირი გაათავისუფლეს.

თბილისის საქალაქო სასამართლოს ადმინისტრაციულ საქმეთა კოლეგიამ განიხილა და დააკმაყოფილა საქართველოს პროკურატურის პროტესტები, რომლის თანახმადაც, ამა წლის 21 ივნისს ადმინისტრაციული სამართალდარღვევისათვის შეფარდებული სახდელის ზომა - პატიმრობის ვადა 51 პირის მიმართ შეიცვალა და შემცირდა. თბილისის საქალაქო სასამართლოს მოსამართლეთა დადგენილებების საფუძველზე, 51 პირი დაუყოვნებლივ გათავისუფლდა ადმინისტრაციული პატიმრობიდან", - ნათქვამია თბილისის საქალაქო სასამართლოს ინფორმაციაში.

სულ აქციის მიმდინარეობისას სამართალდამცველებმა 305 პირი დააკავეს. ნაწილს 12-დღიანი პატიმრობა ჰქონდა შეფარდებული.

ყველა დაკავებული მოქალაქის გათავისუფლებით, აქციის მონაწილეების კიდევ ერთი მოთხოვნა დაკმაყოფილდა. ამ ეტაპზე აქციის მონაწილეები, შს მინისტრის გიორგი გახარიას გადადგომას ითხოვენ.

Patreon P მხარი დაუჭირე "ექსპრესნიუსს" →

ავტორი: ლუკა ცარციძე, ექსპრესნიუსის რეპორტიორი 2019 წლიდან