ათასობით წლის განმავლობაში საქართველო იდგა ცივილიზაციების გზაჯვარედინზე და უამრავი უცხო ქვეყნის შემოსევას გადაურჩა; ამ გამოცდილების გამო ჩვენ ვიქეცით გამძლე ერად, რომელიც აფასებს თავისუფლებას, უსაფრთხოებასა და სტაბილურობას, - ამის შესახებ საქართველოს პრემიერ-მინისტრი მამუკა ბახტაძე ამერიკულ გამოცემა The Hill-ში გამოქვეყნებულ წერილში აღნიშნავს, რომლის სათაურია - "აშშ-საქართველოს ურთიერთობა ახლა უფრო მნიშვნელოვანია, ვიდრე ოდესმე ყოფილა".

მთავრობის მეთაური წერილში ხაზს უსვამს აშშ-საქართველოს სტრატეგიულ პარტნიორობას და აღნიშნავს, რომ ძლიერი ამერიკული ლიდერობა მსოფლიოს უკეთეს და უსაფრთხო ადგილად აქცევს, როგორც საკუთარი მოქალაქეებისთვის, ისე - ყველასთვის.

"ვყოფილვარ კომპანიის გენერალური დირექტორიც და ფინანსთა მინისტრიც, ახლა უკვე პრემიერ-მინისტრი ვარ და შემიძლია დაგიდასტუროთ, რომ ამერიკა არის მსოფლიოში დემოკრატიის, მშვიდობისა და კეთილდღეობის უდიდესი კატალიზატორი.  1991 წელს დამოუკიდებლობის აღდგენის დღიდან ამ სამ სვეტს ეფუძნება საქართველოს განვითარების მოდელი. ათასობით წლის განმავლობაში იდგა საქართველო ცივილიზაციების გზაჯვარედინზე და უამრავი უცხო ქვეყნის შემოსევას გადაურჩა. ამ გამოცდილების გამო ჩვენ ვიქეცით გამძლე ერად, რომელიც აფასებს თავისუფლებას, უსაფრთხოებასა და სტაბილურობას. ჩვენ ასევე ვისწავლეთ, რომ მეგობრები ახლოს უნდა გვყავდეს და ჩვენი წვლილი შევიტანოთ ჭეშმარიტი მეგობრობის საქმეში. შეერთებულ შტატებში უკვე აღიარებულია მშვიდობის განმტკიცებაში ჩვენი წვლილი  და სხვებისთვის სამაგალითოდ მოვიაზრებით. ამერიკის მხრიდან ჩვენი ქვეყნის დამოუკიდებლობის ეგზისტენციალური ეკონომიკური მხარდაჭერა და უსაფრთხოების სფეროში დახმარება ფასდაუდებელია და ამის გაზვიადება შეუძლებელია. ბოლო წლებში საქართველომ  გააძლიერა ურთიერთობები აშშ-თან და ამერიკული იდეალებისა და თავისუფალი ბაზრის, პროდასავლური პოლიტიკის შესაბამისად ჩამოყალიბდა. მჭიდრო თანამშრომლობის გზით, ჩვენს ორ ერს ღრმა, მტკიცე და ურთიერთსასარგებლო ურთიერთობა აქვს განვითარებული უსაფრთხოებისა და თავდაცვის სფეროში. ჩვენ ვიზიარებთ პრეზიდენტ ტრამპის მოსაზრებას, რომ მოწინააღმდეგესთან დიალოგი ბევრად სჯობს მასთან კონფლიქტს. საქართველო მზად არის, დაეხმაროს ამერიკას ჩვენი რეგიონის ერთი შეხედვით გადაუჭრელი პრობლემების გადაწყვეტის პოვნაში. საქართველო მდებარეობს ამერიკისთვის ბევრი სასიცოცხლო ინტერესის კვეთაზე. ჩვენ  ვართ ნატოს შავი ზღვის უსაფრთხოების არქიტექტურის ნებისმიერი წარმოსახვითი ღუზა და ევროპისა და აზიის ვაჭრობისა და ენერგომარშრუტების დამაკავშირებელი უცილობელი კარიბჭე. როგორც ამერიკის უახლოეს პარტნიორს ამ რეგიონში, საქართველოს, გეოგრაფიამ და ისტორიამ მნიშვნელოვანი ცოდნა შესძინა ფართო რეგიონულ და ახლო აღმოსავლეთის კულტურათა და ინტერესების სფეროში", - ნათქვამია პრემიერ-მინისტრის წერილში.

პუბლიკაცია დღეს პოლიტიკურ გამოცემა The Hill-ში გამოქვეყნდა, რომელსაც აშშ-ში დიდი აუდიტორია ჰყავს.

ავტორი: ,

სოციალური ქსელები

ევროპარლამენტში მუშაობა 1 წლით სამთავრობო „რუსთავი 2“-სა და PosTV-საც აეკრძალათ -კშიშტოფ ბრეიზა

შშმ არასრულწლოვან გერსა და ცოლზე ძალადობის, იძულების და მუქარისთვის 1 პირი დააკავეს

ექიმების განცხადება: მოვუწოდებთ სახელმწიფოს, შეიმუშაოს იშვიათი დაავადებების მართვის მკაფიო პოლიტიკა

კიევის სასამართლომ ფულის გათეთრების საქმეზე უკრაინის პრეზიდენტის ადმინისტრაციის ყოფილი ხელმძღვანელი, ანდრეი იერმაკი დააკავა