მთავრობის დღევანდელ სხდომაზე  „საპარტნიორო ფონდის“ მიერ გასაფორმებელი მნიშვნელოვანი შეთანხმებები განიხილება, რომელთა საფუძველზეც საქართველოში ძალიან მსხვილი საინვესტიციო ფონდები შემოდიან.

 საქართველოს პრემიერ-მინისტრ გიორგი კვირიკაშვილის განმარტებით, პირველად მოხდება საპარტნიორო ფონდის მიერ ინვესტირება საერთაშორისო კონსორციუმში, რომელიც ფოკუსირებული იქნება საქართველოში მცირე და საშუალო ბიზნესის ხელშეწყობაზე.

მთავრობის მეთაურის თქმით, „საპარტნიორო ფონდი“ კანადური საინვესტიციო ფონდის “გაზელ ფონდის” (Gazelle Fund) პარტნიორი ხდება.

„Gazelle Fund-ის კაპიტალი საწყის ეტაპზე 27,5 მლნ დოლარია, ხოლო შემდგომ მისი საინვესტიციო მოცულობა გაიზრდება 70 მლნ აშშ დოლარამდე. მნიშვნელოვანია, რომ ფონდი არის რეგიონული ხასიათის, რომელმაც ცენტრალურ ადგილად აირჩია საქართველო და ფონდის კაპიტალის 60% საქართველოში დაიხარჯება. ეს ძალიან მნიშვნელოვანი ფაქტია, რომ საერთაშორისო ფონდმა Gazelle Fund-მა ფუნქციონირების ადგილად საქართველო აირჩია და მას ექნება რეგიონული დანიშნულება. ასევე, ფონდის პარტნიორები არიან ჰოლანდიის სახელმწიფო საინვესტიციო ფონდი DGGF და ჰოლანდიის განვითარების ბანკი FMO,“ - განაცხადა პრემიერმა.

გიორგი კვირიკაშვილის ინფორმაციით, საპარტნიორო ფონდი ასევე ახორციელებს მნიშვნელოვან პროექტს ენერგეტიკის სფეროს განვითარებისთვის, რომლის ფარგლებშიც საქართველოში შემოდის ცნობილი ამერიკული საინვესტიციო ჯგუფი Schulze Global Investements (USA) და ასევე მრავალწლიანი გამოცდილების მქონე ევროპული საინვესტიციო ფონდები, რაც ქართულ საინვესტიციო ბაზარს კიდევ უფრო მიმზიდველს გახდის.

„Schulze Global Investements-ს აქვს საერთაშორისო მასშტაბით ოპერაციები. მათი ძირითადი ოფისი მდებარეობს სინგაპურში. ეს არის ძალიან სერიოზული საერთაშორისო საფინანსო ფონდი, რომელიც შემოდის საქართველოში „საპარტნიორო ფონდთან“ ერთად. ისინი გეგმავენ საქართველოში ინვესტირებას. უახლოეს მომავალში საპარტნიორო ფონდი ასევე გეგმავს დამატებით ორი მსხვილი ინვესტორის მოზიდვას, ესენი არიან: ამერიკული ფონდი Maclellan Foundation და ცნობილი ფრანგი ინვესტორი Dominique Romano, რომლებიც ჯამურად ფონდის წინაშე აიღებენ 10,000,000 აშშ დოლარის ინვესტირების ვალდებულებას“, - აღნიშნა პრემიერ-მინისტრმა.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

საქართველო ტრადიციულად ევროვიზია 2026-ის ფინალში ვერ მოხვდა

ტრამპი- სი-ს სამიტი: ჩიპების ნაცვლად, ჩინეთი ხელოვნური ინტელექტის ომს განიხილავს

CNN: წელიწადნახევრის წინ ჩაძირული რუსული გემი შესაძლოა ჩრდილოეთ კორეისკენ მიემართებოდა, რომელსაც ბირთვული რეაქტორები გადაჰქონდა

რუბიო ჩინეთში სხვა სახელით გაფრინდა, რათა თავი აერიდებინა პეკინის დაწესებული სანქციებისთვის