იუსტიციისა და თავდაცვის სამინისტროები „ინტერპრესნიუსთან“ თანამშრომლობას წყვეტენ

2016-03-11 18:23:54, 651 ნახვა

პოლიტიკა

საქართველოს იუსტიციის სამინისტრო საინფორმაციო სააგენტო „ინტერპრესნიუსთან“ და „რადიო ფორტუსთან“ აღარ ითანამშრომლებს, - ამის შესახებ იუსტიციის მინისტრი თეა წულუკიანი Facebook-ის საკუთარ გვერდზე წერს.

„როგორც ყოფილი ოპოზიციონერი, როგორც ქალი და შესაბამისად ადამიანი (მეტი სხვა სტატუსი არც მინდა ამის წერისას რომ მქონდეს და მძულს ისიც კი, რომ ამის წერა მიწევს), საჯაროდ ვაცხადებ, რომ სამინისტროს სისტემა ipn.ge-თან და ასევე რადიო ფორტუნასთან, მომხდარის გამო, აღარ ითანამშრომლებს.

ეს ნიშნავს იმას, რომ ნიუსებს ჩვენგან ოფიციალური რელიზების თუ ინფორმაციების სახით, აღარ მიიღებთ. ინსტრუქცია უკვე ჩაშვებულია აპარატში და სამინისტროს 11-ვე სსიპ-ში და პირადად გავაკონტროლებ ყველა ჩემი სტრუქტურის ყველა პიართანამშრომელს, რომელიც ამ ინსტრუქციის დარღვევისათვის მკაცრად დაისჯება.

მედიამ, მათ შორის პოპულარულმა, მაუწყებლობის ელემენტარული წესები უნდა იცოდეს.

45-50 წუთი დასჭირდათ სპეცსამსახურებსა და აიტი-სპეციალისტებს, პარტნიორებს, რეაგირებისა და დაბლოკვისათვის, ტირაჟირება კი ზოგიერთს ამ პერიოდში ვერავინ დაასწრო. (გულისრევის სმაილი)“, - წერს თეა წულუკიანი.

სააგენტოსთან თანამშრომლობას თავდაცვის სამინისტრო და ყველა მათ დაქვემდებარებაში მყოფი სუბიექტიც წყვეტს. ამის შესახებ თავდაცვის მინისტრი თინა ხიდაშელი "ფეისბუქის" გვერდზე წერს.

„სრულიად მიუღებელი, უზნეო და ამორალური ფაქტის მოწმე გავხდით მორიგ ჯერზე. ჩვენ ყველამ ერთად უნდა ვაჩვენოთ მსგავსი ქმედების მიუღებლობა და შეურიგებლობა. პროტესტი უნდა იყოს ქმედითი. თავდაცვის სამინისტრო და ყველა ჩვენს დაქვემდებარებაში მყოფი სუბიექტი წყვეტს ამ სააგენტოსთან ურთიერთობას. არ შეიძლება, აღარ უნდა დავუშვათ, არ უნდა შევეგუოთ!“, - წერს თინა ხიდაშელი.

ცნობისთვის, სოციალურ ქსელში პირადი ცხოვრების ამსახველი ვიდეო გავრცელდა, რომლის ტირაჟირებაც აღნიშნულ სააგენტოზე მოხდა. ვიდეომასალა, სავარაუდოდ, ოპოზიციის ერთ-ერთ წევრს ეკუთვნის. ცოტა ხნის წინ Youtube-მა აღნიშნული ვიდეომასალა დაბლოკა.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან