2022-03-10 23:46:09, 961 ნახვა
მსოფლიო
მარკ რუტეს განცხადებით, უკრაინისათვის ევროკავშირში გაწევრიანების მოკლე გზა არ არსებობს
ნიდერლანდების სამეფოს პრემიერ-მინისტრი, მარკ რუტე აცხადებს, რომ უკრაინის ევროკავშირში გაწევრიანების სწრაფი გზა არ არსებობს.
UNIAN-ის კორესპონდენტის ცნობით, რუტემ ამის შესახებ ვერსალში (საფრანგეთი) ევროკავშირის წევრი ქვეყნების სახელმწიფოთა და მთავრობათა მეთაურთა არაფორმალური სამიტის დაწყებამდე განაცხადა.
მარკ რუტეს თქმით, ნიდერლანდები იყო ერთ-ერთი პირველი ქვეყანა, რომელმაც უკრაინას მხარი დაუჭირა, რაც მიანიშნებს იმაზე, რომ სახელმწიფო უკრაინის გვერდით დგას.
„პირველ რიგში, ნიდერლანდები იყო ერთ-ერთი პირველი ქვეყანა, რომელიც გამოვიდა სამხედრო მხარდაჭერით. ერთ-ერთი პირველი ქვეყანა, რომელმაც მხარი დაუჭირა სანქციების მკაცრ პაკეტს. ამიტომ, ეჭვგარეშეა, რომ ნიდერლანდები უკრაინის გვერდით დგას, მაგრამ ამ პროცესში, არ არსებობს დაჩქარებული შესვლის მარშრუტი. ის არ არსებობს“, - განაცხადა რუტემ.
ავტორი: ექსპრესნიუსი,
epn.ge (@expressnews.ge)
