2021-03-12 11:14:31, 678 ნახვა
სამართალი
„ტვ პირველი“ დღეს მოსამართლის განჩინებას სააპელაციო სასამართლოში გაასაჩივრებს
„ტვ პირველი“ დღეს საქალაქო სასამართლოს მოსამართლის, ლაშა კლდიაშვილის განჩინებას სააპელაციო სასამართლოში გაასაჩივრებს.
ტელევიზია მეორე ინსტანციისგან განჩინების არაკონსტიტუციურად ცნობასა და მის გაუქმებას ითხოვს.
„ტვ პირველის“ ადვოკატი გიორგი მამულაშვილი აცხადებს, რომ განჩინების არ გაუქმება უკანონობა იქნება.
შეგახსენებთ, რომ „ტვ პირველმა" 6 მარტს გაავრცელა ფარული აუდიო ჩანაწერები, სადაც ბერა ივანიშვილი ირაკლი ღარიბაშვილთან ერთად მისთვის არასასურველი კომენტარების გამო, რამდენიმე პირის დასჯას უკვეთავს. საქმესთან დაკავშირებით პროკურატურამ გამოძიება დაიწყო. გუშინ თბილისის საქალაქო სასამართლომ გასცა განჩინება, რომლის მიხედვითაც, პროკურატურას ნებისმიერ დროს ტელევიზიაში შესვლა და მასალების ამოღება შეუძლია.
ავტორი: ცოტნე ტალახაძე, ექსპრესნიუსის რეპორტიორი 2019 წლიდან
epn.ge (@expressnews.ge)
