გამბედაობა არ მაკლია და არც ეკა ბესელიას ჩამოვუვარდები ძალითა და გამბედაობით, – ამის შესახებ ჟურნალისტებს პარლამენტის პირველმა ვიცე-სპიკერმა, თამარ ჩუგოშვილმა განუცხადა, რომელიც დამოუკიდებელი დეპუტატის ეკა ბესელიას განცხადებას გამოეხმაურა.

ჩუგოშვილმა კიდევ ერთხელ განმარტა, რომ ეკა ბესელიასა და ბიძინა ივანიშვილთან შეხვედროს დროს უზენაეს სასამართლოში მოსამართლეების დანიშვნის თემა განიხილებოდა.

მისივე თქმით, შეხვედრაზე საუბარი სხვა საკითხებზეც იყო, რაც ორი ადამიანის დახურული შეხვედრაა და საუბარს არ აპირებს.

„სასამართლოების თემაზე არაერთი შეხვედრა გვქონდა. რამდენიმე შეხვედრა იყო, რომელსაც უმრავლესობის სხვადასხვა წევრები ესწრებოდნენ. ერთ-ერთ შეხვედრას მე და ეკა ბესელია ერთად ვესწრებოდით. ყველა შეხვედრა იმას ეხებოდა, როგორ უნდა გაგრძელებულიყო მოსამართლეების დანიშვნის პროცესი მას შემდეგ, რაც იუსტიციის უმაღლესმა საბჭომ ათკაციანი სია გამოაგზავნა. მე და ჩემი კოლეგები ამ სიას ვეწინააღმდეგებოდით. ჩემი პოზიცია სიასთან დაკავშირებით იყო და რჩება შემდეგი, რომ მოსამართლეების დანიშვნა იმ ფორმით და იმ სახით, როგორც იუსტიციის უმაღლესმა საბჭომ მოინდომა დეკემბერში, არასწორი, მიუღებელი იყო, ამას საქართველოს პარლამენტი მხარს არ დაუჭერდა და ეს ასეც მოხდა. პარლამენტს იმ სიის განხილვა არ დაუწყია, რადგან შევთანხმდით, რომ ჯერ კანონი პარლამენტს უნდა მიეღო, ხანგრძლივი, რთული პროცესი უნდა ყოფილიყო კანდიდატების დანიშვნა. ჩემს მიმართ კონკრეტულად ვინმეს ხმის მიცემაზე არავითარი საუბარი არ ყოფილა. მხოლოდ იმაზე ვსაუბრობდით, მოსამართლეების დანიშვნის საკითხი როგორ უნდა გაგრძელებულიყო იმის გათვალისწინებით, რომ საბჭოს მიერ წარმოდგენილმა სიამ დიდი პროტესტი გამოიწვია დეპუტატებშიც და საზოგადოებაშიც. შეხვედრაზე საუბარი სხვა საკითხებზეც იყო, რაც არის ორი ადამიანის დახურული შეხვედრა, სხვა დეტალებზე საუბარს არ ვაპირებ. თუ საჭიროდ ჩათვლიან, საუბარი ორივეს შეუძლია, არც ერთს არ აქვს მედიასთან ურთიერთობის პრობლემა და შეუძლიათ, დანარჩენ დეტალებზე ისაუბრონ.  ჩემთვის ამოცანა ეს არის, დანარჩენი პოლიტიკურ კონკურენციაში ვინ როგორ შედის, ვინ რა პოლიტიკურ შეხლა-შემოხლაშია ერთმანეთთან, ჩემი საქმე არ არის. მთავარია, პარლამენტში მოსამართლეობის კანდიდატებთან გასაუბრება მიდის და გადაწყვეტილებას იმის მიხედვით მივიღებთ, გასაუბრებას, ვინ როგორ გაუმკლავდება“, - განაცხადა თამარ ჩუგოშვილმა.

 ცნობისთვის, პარლამენტის დამოუკიდებელი დეპუტატი ეკა ბესელია აცხადებს , რომ  „ქართული ოცნების“ თავმჯდომარე ბიძინა ივანიშვილმა მოსამართლეობის კანდიდატების მხარდაჭერა მოსთხოვა. როგორც დეპუტატმა აღნიშნა, შეხვედრაზე მას უთხრეს, რომ იმ დროისთვის წარმოდგენილი 10-კაციანი სიიდან, სულ მცირე 5 მოსამართლის დამტკიცება უნდა მომხდარიყო.

ავტორი: ელენე გვიმრაძე, ექსპრესნიუსის რეპორტიორი 2018 წლიდან

სოციალური ქსელები

SJP-მ ფორმულას, ტვ პირველისა და პუბლიკას საქმეებზე განგაშის სიგნალი ჩართო

ცაგერის საკრებულოს დეპუტატი „ქურდული სამყაროს“ მხარდაჭერის ბრალდებით დააკავეს

მარეგულირებელი კომისიის მიერ ტვ პირველისთვის დაკისრებული სანქციის გამო, ევროსაბჭომ განგაში გამოაცხადა

ე.წ. ქურდული გარჩევების საქმეზე დაკავებული ლალო გველესიანი და სხვა პირები პატიმრობაში გაუშვეს