2019-09-13 11:33:32, 2088 ნახვა

---

ფინანსთა სამინისტრო სამგორი-ლილო-რუსთავის ურბანული სარკინიგზო პროექტის დასაფინანსებლად EBRD-სა და EIB-სთან მოლაპარაკებებს იწყებს

ფინანსთა სამინისტრო სამგორი-ლილო-რუსთავის დამაკავშირებელი ურბანული სარკინიგზო პროექტის დასაფინანსებლად EBRD-სა და EIB-სთან მოლაპარაკებებს იწყებს  - ამის შესახებ ფინანსთა მინისტრმა ივანე მაჭავარიანმა ჟურნალისტებს განუცხადა.

მაჭავარიანის ინფორმაციით, საუბარი 174-დან 218-მდე  მილიონი დოლარის სესხზეა, თუმცა, როგორც მინისტრმა აღნიშნა, ამ პროექტის ფარგლებში გრანტების მოზიდვაც იქნება შესაძლებელი.

„დღეს ძალიან საინტერესო განკარგულების პროექტი გამოვიდა მთავრობის სხდომაზე - ეს არის პროექტი, რომლის თანახმადაც ფინანსთა სამინისტრო დაიწყებს მოლაპარაკებებს  ევროპის რეკონსტრუქციისა და განვითარების ბანკთან (EBRD)  და ევროპის საინვესტიციო ბანკთან (EIB).  ორივესთან ვაწარმოებთ მოლაპარაკებებს თბილისის ურბანული რკინიგზის განსახორციელებლად. სავარაუდოდ, ეს პროექტი არის საკმაოდ მსხვილი და ეს არის სამგორი-ლილოს მიმართულებით საქალაქო ურბანული რკინიგზის განვითარების პროექტი. დააახლოებით, შვიდამდე სადგური იქნება და, რაც მთავარია, ამ პროექტის ფარგლებში, ურბანული სარკინიგზო პროექტით რუსთავთან დაკავშირება იგეგმება. ეს არის თბილისის მერიის ინიციატივა და მათ მოგვმართეს თხოვნით, რომ ჩვენ დავიწყოთ მოლაპარაკებები ამ საკითხთან დაკავშირებით. თანხა, დაახლოებით 174 მილიონი დოლარიდან 218 დოლარამდე იქნება, იმის და  მიხედვით,  იქნება ეს ერთხაზიანი რკინიგზა თუ ორხაზიანი.

ჩვენ ვიცით, რომ   EBRD-ის და  EIB-ის, ორივეს აქვს ამ პროექტის ინტერესი.  პირველადი მოთელვა მათ და მერიას შორის მოხდა და მერიამ ამ ეტაპზე გვთხოვა, რომ ფინანსთა სამინისტრო ჩართულიყო უშუალოდ პროექტის დეტალებში. ეს იქნება სესხი, თუმცა ეს ის სფეროა, სადაც გრანტებიც მოზიდვაც შესაძლებელია.  ეს არის  ტრანსპორტთან დაკავშირებული, რუსთავის დაკავშირება თბილისთან და,  როგორც წესი,  ეს ის სფეროებია, სადაც გრანტები შესაძლებელია მოვითხოვოთ“, - განაცხადა ივანე მაჭავარიანმა.

---

ავტორი: ექსპრესნიუსი,

---

დღის თემა

მთავარი თემა

ინტერვიუ - ექსკლუზივი