2019-07-07 15:11:58, 1099 ნახვა

---

ეუთო-ს საპარლამენტო ასამბლეის პოლიტიკურ საკითხთა და უსაფრთხოების კომიტეტზე საქართველოს მიერ მომზადებული რეზოლუციის პროექტი მიიღეს

50 მომხრე ხუთის წინააღმდეგი ეუთო-ს საპარლამენტო ასამბლეის პოლიტიკურ საკითხთა და უსაფრთხოების კომიტეტზე საქართველოს რეზოლუციის პროექტი მიიღეს.

26 პუნქტიანი დოკუმენტი საქართველოს ოკუპირებულ ტერიტორიებზე ადამიანის უფლებების მხრივ არსებულ ვითარებას ეხება. რეზოლუციაში რუსეთის არალეგალური ქმედებების გამო საქართველოს ოკუპირებულ ტერიტორიებზე უსაფრთხოების, ადამიანის უფლებებისა და ჰუმანიტარული ვითარების გაუარესებაა დაგმობილი. მათ შორის კი ჩამოთვლილია საოკუპაციო ხაზთან მავთულხლართების გაბმა, აფხაზეთისა და სამხრეთ ოსეთის რეგიონებში არსებული ეთნიკური დისკრიმინაცია. ზემოთ აღნიშნულ დარღვევებში კი მკვლელობის, წამების, უხეში მოპყრობის, გატაცების და უკანონო დაკავებების ფაქტებია მოყვანილი.

რეზოლუცია ასევე მკაცრად გმობს ოკუპირებულ ტერიტორიებზე ქართული ენით სწავლების აკრძალვას. დოკუმენტში ხაზგასმულია, რომ რეგიონში ადამიანის ფუნდამენტური უფლებები ირღვევა.

რეზოლუციის პროექტი გმობს რუსეთის მიერ ოკუპირებული ტერიტორიების წარმომადგენლების მიერ საქართველოს მოქალაქეების, არჩილ ტატუნაშვილის, გიგა ოთხოზორიას და დავით ბაშარულისმკვლელობებს. დოკუმენტში ასევე ნახსენებია ოკუპირებულ აფხაზეთში, რუსეთის უკანონო სამხედრო ბაზაზე ირაკლი კვარაცხელიას სიკვდილის ფაქტიც.

საქართველოს მიერ მომზადებული დოკუმენტი რუსეთს საერთაშორისო სამართლის ფუნდამენტური ნორმებისა და პრინციპების დაცვისკენ მოუწოდებს.

ამასთან ერთად, რეზოლუციაში აღნიშნულია, რომ რუსეთის ფედერაციამ საქართველოს ოკუპირებული ტერიტორიების ე.წ. დამოუკიდებლობის აღიარებასთან დაკავშირებით მიღებული უკანონო გადაწყვეტილება უნდა გააუქმოს.

---

ავტორი: ექსპრესნიუსი,

---

დღის თემა

მთავარი თემა

ინტერვიუ - ექსკლუზივი