გიორგი გახარია: ჩემთვის ის მოდელია მისაღები, რომელშიც კომერციული საბანკო სექტორი კომფორტულად გრძნობს თავს

2015-06-04 16:34:23, 761 ნახვა

ეკონომიკა

„ჩემთვის ის მოდელია მისაღები, რომელშიც კომერციული საბანკო სექტორი თავს კომფორტულად იგრძნობს“,-ამის შესახებ ბიზნეს ომბუდსმენმა გიორგი გახარიამ ჟურნალისტებს ეროვნული ბანკიდან საბანკო ზედამხედველობის გამოყოფის საკითხზე საბანკო სექტორთან შეხვედრის დაწყების წინ განუცხადა.
მისივე თქმით, ბიზნეს სექტორი ამ პროცესში აუცილებლად უნდა იყოს ჩართული.
„მხარეებს შორის პოზიციების შეჯერების რესურსი არსებობს. ეს შეხვედრა ტარდება ჩვენი თხოვნით და მინდა ყველა მხარეს მადლობა გადავუხადო. მიზანი, არის ის რომ მივაღწიო კომპრომისს. წინა შეხვედრაზე ბიზნესის მხრიდან ძირითადი აქცენტი ამ პროცესის ფორმაზე გაკეთდა და ჩვენ შევეცადეთ ამ საკონონმდებლო ცვლილლებებზე მუშაობის ფორმაში შევიტანოთ გარკვეული ცვლილებები, რომ ბიზნესის ჩართულობა მაქსიმალური იყოს. ესაა კონსენსუსის მიღწევის ერთადერთი საშუალება. იმდენად სპეციფიური და რთული თემაა, რომ იმედი მაქვს დღევანდელი შეხვედრის შემდეგ აღარ დაისმება საკითხი, უნდა გაკეთდეს თუ არა ეს. ჩემთვის ის მოდელია მისაღები, რომელშიც კომერციული საბანკო სექტორი თავს კომფორტულად იგრძნობს“,-განაცხადა გიორგი გახარიამ.
ამასთან, ბიზნეს ომბუდსმენის თქმით, მისთვის უცნობია, თუ რა პოზიცია აქვს აღნიშნულ საკითხთან დაკავშირებით პრემიერ-მინისტრს.
ცნობისთვის, სასტუმრო „რედისონში“ ეროვნული ბანკის შესახებ საქართველოს ორგანულ კანონში დაგეგმილი ცვლილებების თაობაზე შეხვედრა იმართება.
შეხვედრას ცვლილების ინიციატორი პარლამენტის საფინანსო-საბიუჯეტო კომიტეტის წევრები ბიზნეს და საბანკო სექტორის წარმომადგენლები და ბიზნეს ომბუდსმენი გიორგი გახარია ესწრებიან.