საფრანგეთი, გერმანია და აშშ, რუსეთს ბრიტანეთის სუვერენიტეტის დარღვევაში ადანაშაულებენ

2018-03-15 18:12:28, 2265 ნახვა

მსოფლიო

დიდი ბრიტანეთის, საფრანგეთის, გერმანიის და ამერიკის შეერთებული შტატების ლიდერები რუსეთს გაერთიანებული სამეფოს სუვერენიტეტის დარღვევაში ადანაშაულებენ.

ტერეზა მეი, ემანუელ მაკრონი, ანგელა მერკელი და დონალდ ტრამპი, მოსკოვს მოუწოდებენ, ექსპოლკოვნიკის მოწამვლასთან დაკავშირებულ ყველა კითხვას უპასუხოს.

„სკრიპალის წინააღმდეგ გამოყენებული ნერვულ-პარალიტიკური ნივთიერება ევროპის ტერიტორიაზე, მეორე მსოფლიო ომის შემდეგ პირველად გამოიყენეს. მსგავსი ქმედება ნებისმიერი სახელმწიფოს მხრიდან, კონვენციის დარღვევაა და საერთაშორისო სამართალს ეწინააღმდეგება. სკრიპალისა და მისი ქალიშვილის მოწამვლა დიდი ბრიტანეთის სუვერენიტეტზე თავდასხმაა. ეს არის მუქარა თითოეული ჩვენი ქვეყნის უსაფრთხოებაზე“, - ნათქვამია გავრცელებულ განცხადებაში.

ამასთან, 4 ქვეყნის ლიდერები, მოითხოვენ, რომ რუსეთმა, მოწამვლის დროს გამოყენებული ქიმიური ნივთიერების დამზადების პროგრამის დეტალები გაასაჯაროოს.

შეგახსენებთ, რომ ბრიტანეთის პრემიერ-მინისტრმა ტერეზა მეიმ, რუსეთის დაზვერვის ყოფილი ოფიცრის, სერგეი სკრიპალისა და მისი შვილის მოწამვლაში კრემლი დაადანაშაულა და ქვეყნიდან 23 რუსი დიპლომატის გაძევების გადაწყვეტილება მიიღო. ამასთან, პრემიერის თქმით, ბრიტანეთი რუსეთთან უმაღლეს დონეზე ყველანაირ კონტაქტს წყვეტს.

Patreon P მხარი დაუჭირე "ექსპრესნიუსს" →

ავტორი: ,

სოციალური ქსელები