მამუკა კობახიძე: მეტროსადგურ „ვარკეთილში“ ჩატარებულ სამუშაოზე ექსპერტიზის დასკვნა არსებობს

2018-01-30 13:46:19, 2095 ნახვა

კომენტარი

შპს "თბილისის სატრანსპორტო კომპანიის" გენერალური დირექტორია მამუკა კობახიძის ინფორმაციით, მეტროსადგურ "ვარკეთილში" ჩატარებულ სარეაბილიტაციო სამუშაოზე ექსპერტიზის დასკვნა არსებობს.

როგორც კობახიძემ აღნიშნა, მიუხედავად არსებული დასკვნისა, საჭიროა დამოუკიდებელი ექსპერტების ჩართვა. მანვე დასძინა, რომ ადგილზე ექსპერტ-კრიმინალისტები მუშაობენ.

"ამბავი დაახლოებით 10:30 საათზე მოხდა. 7 ადამიანი იმყოფებოდა ამ დროს ბაქანზე. კიდევ 2 ადამიანზე ვრცელდება ინფორმაცია, რომ აქვთ დაზიანებები მიღებული. საბედნიეროდ, ამ ყველაფერს მსხვერპლი არ მოჰყოლია, თუმცა 2 ადამიანის დაზიანება არის შედარებით მძიმე, ხოლო დანარჩენებს მსუბუქი დაზიანებები აქვთ მიღებული. დღეს მეტროსადგური "ვარკეთილი" უკვე დაკეტილია. მატარებლის მოძრაობა მოხდება სამგორი-ახმეტილის მიმართულებით. ადგილზე ახლა ექსპერტ-კრიმინალისტები მუშაობენ. დამოუკიდებელი ექსპერტიზა განახორციელებს, როგორც "ახმეტელის" ასევე "ვარკეთილის" მეტროსადგურების შემოწმებას, სადაც ერთიდაიგივე კომპანიამ ჩაატარა სარეაბილიტაციო სამუშაოები. შესრულებულ სამუშაოზე ექსპერტიზის დასკვენბი არსებობს, თუმცა ექსპერტების ჩართვა აუცილებელია, რომ დადგინდეს რა იყო ჭერის ჩამონგრევის მიზეზი", - განაცხადა მამუკა კობახიძემ.

შეგახსენებთ, რომ მეტროსადგურ "ვარკეთილში" ჭერის ჩამონგრვის შედეგად 14 ადამიანი დაშავდა, მათ შორის ერთი სამართალდამცველი. დაშავებულები საავადმყოფოში არიან გადაყვანილი. ადგილზე მაშველებთან ერთად საპატრულო პოლიციის და სასწრაფო დახმარების ჯგუფებია მობილიზებული. ინციდენტის ადგილზე ასევე ქალაქის მერი კახა კალაძე და სამგორის რაიონის გამგებელი დავით კერესელიძე მივიდნენ. მომხდართან დაკავშირებით, გამოძიება სსკ-ის 240-ე მუხლით მიმდინარეობს (უსაფრთხოების წესის დარღვევა სამთო, სამშენებლო ან სხვა სამუშაოს წარმოებისას, რამაც გამოიწვია ჯანმრთელობის ნაკლებად მძიმე ან მძიმე დაზიანება).

Patreon P მხარი დაუჭირე "ექსპრესნიუსს" →

ავტორი: ,

სოციალური ქსელები