საქართველოში გატაცებული აზერბაიჯანელი ჟურნალისტის აფგან მუხთარლის ადვოკატმა არჩილ ჩოფიკაშვილმა მისი დაცვის ქვეშ მყოფისთვის და ლეილა მუსტაფაევასთვის დაზარალებულის სტატუსის მინიჭების მოთხოვნით,  საქალაქო სასამართლოში სარჩელი შეიტანა. 

ჩოფიკაშვილის განცხადებით, ამ სტატუსის მინიჭება მათთვის მნიშვნელოვანია და პროკურატურამ შესაბამისი დადგენილება ამ დრომდე არ მიიღო.

„ეს არის საჩივარი, რომლითაც ვითხოვთ საქალაქო სასამართლოდან, რომ დაზარალებულად ცნონ აფგან მუხთარლი სისხლის სამართლის კოდექსის 143-ე მუხლის, მეოთხე ნაწილით გათვალისწინებულ დანაშაულში. ასევე დაზარალებულად ცნონ ლეილა მუსტაფაევა, სისხლის სამართლის 154-ე მუხლით გათვალისწინებულ დანაშაულში. პროკურატურამ ამასთან დაკავშირებით დადგენილება დღემდე არ მიიღო. სწორედ ამიტომ, კანონის შესაბამისად ეს საჩივრდება საქალაქო სასამართლოში. აუცილებელია, რომ მათ ჰქონდეთ ეს სტატუსი. მხოლოდ ამის შემდეგ ექნებათ უფლებები. სასამართლოს აქვს 15-დღიანი ვადა. მთავარი გარემოებაა ის, რომ 29 მაისს ოთხმა ადამიანმა ძალის გამოყენებით ჩასვა „ოპელის“ მარკის ავტომობილში აფგან მუხთარლი და ის გაიტაცეს. ეს დასტურდება მოწმეების ჩვენებებით. ის ამჟამად აზერბაიჯანის ციხეშია და მისთვის შეფარდებული პატიმრობა შეფარდებულია როგორც პოლიტიკური პატიმრობა“, - განაცხადა ადვოკატმა. 

შეგახსენებთ, რომ აზერბაიჯანელი ჟურნალისტი აფგან მუხთარლი 29 მაისს თბილისიდან აზერბაიჯანში გაიტაცეს. მას 3-თვიანი წინასწარი პატიმრობა შეეფარდა. მას ბრალი საზღვრის უკანონო კვეტაში, კონტრაბანდაში და სამართალდამცველებისთვის წინააღმდეგობის გაწევაში ედება. ქართული მხარე აზერბაიჯანელი ჟურნალისტის გატაცებასთან დაკავშირებით, ადგილობრივი სპეცსამსახურების ჩართულობას გამორიცხავს. ჟურნალისტის გატაცების ფაქტს თბილისში მრავალი აქცია მოჰყვა. მოსახლეობა ჟურნალისტის გათავისუფლებას ითხოვს და მთავრობას მოუწოდებს მუხთარლის საქმე გამოიძიოს.

ცნობისთვის, ჟურნალისტი 2015 წლიდან საქართველოში ცხოვრობდა. ის აზერბაიჯანის პრეზიდენტის ილჰამ ალიავის ოჯახის წევრების ქონებასთან დაკავშირებით ჟურნალისტურ გამოძიებას აწარმოებდა.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

ოცნების მეგობარმა ირანის პარლამენტმა უცხოური ჩარევის წინააღმდეგ კანონი დაამტკიცა.

რომელი ბრენდი იმსახურებს ჩემპიონს? - ნინა თიბილაშვილის, ქართველი პარალიმპიელი ჩემპიონის ისტორია

კახეთში ფერმერებმა ატამი ნაგავსაყრელზე გადაყარეს, რადგან მისი გაყიდვა ვერ შეძლეს

უკრაინამ პირველად გამოიყენა ბრიტანული დრონები რუსეთის სიღრმეში საჰაერო დარტყმებისთვის