საქართველოს ყოფილი პრეზიდენტის მიხეილ სააკაშვილის შეფასებით, მოქალაქეებისთვის ევროპაში უვიზო მიმოსვლა ახდენილი ოცნებაა.

ამის შესახებ ყოფილმა პრეზიდენტმა მალტაში, "ევროპის სახალხო პარტიის" ყრილობაზე სიტყვით გამოსვლისას განაცხადა.

როგორც სააკაშვილმა აღნიშნა, ვიზალიბერალიზაციის მისაღებად ქვეყანამ პირველი ნაბიჯები მისი მმართველობის დროს გადადგა. 

ყოფილმა პრეზიდენტმა "ევროპის სახალხო პარტიას" საქართველოსთვის უვიზო მიმოსვლის ამოქმედების მხარდაჭერისთვის მადლობა გადაუხადა. 

"ჩემმა მთავრობამ დაიწყო მოლაპარაკებები ამ საკითხზე, ავაშენეთ აეროპორტები, მოვამზადეთ საჭირო ინფრასტრუქტურა, მაგრამ არ გვჯეროდა, სანამ ეს მართლაც რეალურად არ მოხდა. ეს არის ახდენილი ოცნება. მადლობას ვუხდი "ევროპის სახალხო პარტიას" მხარდაჭერისთვის. მაქვს ორ ფრონტზე ბრძოლის პატივი. ვარ საქართველოს "ერთიანი ნაციონალური მოძრაობის" საპატიო თავმჯდომარე და ვხელმძღვანელობ უსწრაფესად მზარდ პარტიას უკრაინაში, მაგრამ დღეს საქართველოს შესახებ ვილაპარაკებ", - აღნიშნა სააკაშვილმა.

ექს-პრეზიდენტის განმარტებით, "2012 წელს საქართველოს ისტორიაში პირველად გადაეცა ძალაუფლება ახალ ძალას მშვიდობიანი, დემოკრატიული გზით, მაგრამ ეს ადამიანები არასდროს იქნებიან მზად, შექმნან ძალაუფლება ცვლილებებისა და რეფორმების გზით".

"9 წელი ვხელმძღვანელობდით ყველაზე წარმატებული რეფორმების ექსპერიმენტს პოსტ საბჭოთა სივრცეში, ჩვენ შევძელით ქვეყნის რადიკალური შეცვლა და სამაგალითო გავხადეთ რეგიონში. 2012 წელს საქართველოს ისტორიაში პირველად გადაეცა ძალაუფლება ახალ ძალას მშვიდობიანი, დემოკრატიული გზით, მაგრამ ეს ადამიანები არასდროს იქნებიან მზად, შექმნან ძალაუფლება ცვლილებებისა და რეფორმების გზით. დღეს ვართ ასეთ სიტუაციაში. ფორმალურად გვაქვს დემოკრატია, მაგრამ განადგურებულია რეფორმების ექსპერიმენტი, რაც იყო გამოწვევა რუსეთისთვის და პუტინის რეჟიმისთვის. ასეთივე სურათია რეგიონის სხვა ქვეყნებშიც, რაც საფრთხეს უქმნის დემოკრატიულ ღირებულებებს. ამიტომ "ევროპის სახალხო პარტიამ", რომელიც ამ ღირებულებებს ეფუძნება, მის დასაცავად ხმა უნდა აიმაღლოს“, - განაცხადა მიხეილ სააკაშვილმა.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

მაჭავარიანი - სასამართლოზე კითხვა-პასუხის რეჟიმში დავინახავთ ზოგადად რამდენად უსუსურ მდგომარეობაშია ეს აგენტურული ოპოზიცია

ნათია თურნავა – ინფლაციის დონეში ძირითადი წვლილი, სულ მცირე, 2.2% გარე ფაქტორებმა შეიტანა

ქუთაისში მანქანა ქვეითს დაეჯახა, კაცი ადგილზე დაიღუპა

საია - ევროკავშირის 2026 წლის ანგარიში საქართველოში ადამიანის უფლებების საგანგაშო მდგომარეობას კიდევ ერთხელ ადასტურებს