„ევროპული საქართველო“ მთავარ პროკურორს და სუს-ის უფროსს პარლამენტში იბარებს

2017-02-14 14:02:13, 1604 ნახვა

პოლიტიკა

ფრაქცია „მოძრაობა თავისუფლებისთვის - ევროპული საქართველო“ პარლამენტში მთავარ პროკურორს და სახელმწიფო უსაფრთხოების სამსახურის უფროსს იბარებს.

ფრაქციის წევრის, პარლამენტის თავმჯდომარის მოადგილის, სერგი კაპანაძის განცხადებით, ძალოვანი უწყებების პირველი პირები ვალდებულნი არიან ზვიად ნაზღაიზის საქმესთან დაკავშირებით, საპარლამენტო უმცირესობას და საზოგადოებას მოახსენონ თუ რა ეტაპზეა გამოძიება და რა ნაბიჯები გადაიდგა სამართალდამცავი ორგანოების მხრიდან.

„ბოლო ერთი კვირის განმავლობაში გამოვლინდა კონკრეტული ფაქტები, რომლებიც უკავშირდება მაღალი დონის კორუფციას, საუბარია მილიონიან კორუფციულ გარიგებაზე. მიუხედავად იმისა, რომ სუს-ი და პროკურატურა კანონით არიან ვალდებულნი მიიღონ ზომები და დაიწყონ გამოძიება, ჩვენ მათი მხრიდან არც ერთი განცხადება არ მოგვისმენია ამ თემაზე. ჩვენი მოთხოვნაა მოვიდნენ პარლამენტში და ამ საკითხთან დაკავშირებით ანგარიში ჩაგვაბარონ“, - განაცხადა ბრიფინგზე სერგი კაპანაძემ.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან