აფეთქებების სერია სირიაში - გარდაიცვალა 20, დაშავდა 45-ზე მეტი ადამიანი

2016-09-05 13:51:51, 1892 ნახვა

მსოფლიო

სირიის მსხვილ ქალაქებში აფეთქებების სერია განხორციელდა, რის შედეგადაც სულ მცირე 20 ადამიანი გარდაიცვალა, - ამის შესახებ BBC იუწყება.

მედია საშუალების ინფორმაციით, ორი აფეთქება ქალაქ ტარტუსში მოხდა, სადაც რუსული ავიაბაზა მდებარეობს. თავდაპირველად, არზუნის ხიდთან დანაღმული ავტომობილი აფეთქდა. როდესაც დაშვებულების დასახმარებლად შემთხვევის ადგილზე ხალხი შეიკრიბა, თვითმკვლელმა ტერორისტმა მეორე აფეთქება განახორციელა.

სააგენტო SANA-ს ინფორმაციით, ინციდენტის შედეგად 45-ზე მეტი ადამიანი დაშავდა.

როგორც BBC წერს, მესამე აფეთქება დამასკოს დასავლეთ ნაწილში მოხდა. კიდევ ერთი დანაღმული მანქანა კი ჰომსში აფეთქდა, რასაც 2 სამხედრო ემსხვერპლა.

გარდა ამისა, სააგენტო Associated Press-ის ცნობით, აფეთქება მოხდა ქალაქ ელ-ჰასაკაში, რომელიც სირიის ჩრდილო-აღმოსავლეთ ნაწილში მდებარეობს. “სირიის ადამიანის უფლებათა ობსერვატორიის" მონაცემებით, თავდასხმა განხორციელდა ასევე ქალაქ ელ-ქამიშლიში.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან