ზღვისპირა ქალაქი ტრადიციულ დღესასწაულს „ბათუმობას“ სხვადასხვა გასართობი  ღონისძიებებით აღნიშნავს.

სახალხო ღონისძიება ძირითადად ევროპის მოედანზე და მემედ აბაშიძის გამზირზე მიმდინარეობს და ყველა ასაკისა და გემოვნების ბათუმელსა და მის სტუმარზეა  გათვლილი.

აჭარის მთავრობის თავმჯდომარე   ქალაქის ზეიმზე მოწვეულ სტუმრებს ბათუმის მერთან ერთად შეხვდა და მათგან მოლოცვები მიიღო. გახსნის ღონისძიების შემდეგ ზურაბ პატარაძემ, გიორგი ერმაკოვმა, ავთანდილ ბერიძემ, საკრებულოსა და უმაღლესი საბჭოს წევრებმა და მოწვეულმა სტუმრებმა, ბათუმისათვის ბრძოლაში დაღუპულთა სკვერში გადაინაცვლეს, პატივი მიაგეს და ყვავილებით შეამკეს გარდაცვლილთა მემორიალი. მოგვიანებით კი ბათუმის ქუჩებში გაისეირნეს.

აჭარის მთავრობის თავმჯდომარე სტუმრებთან და ბათუმელებთან ერთად მემედ აბაშიძის ქუჩაზე მიმდინარე ღონისძიებებს დაესწრო. სხვადასხვა ადგილებში მოწყობილი  საგამოფენო სივრცეები დაათვალიერა და ადგილობრივებს ბათუმობა მიულოცა:

„ბათუმი და ბათუმელები ნამდვილად იმსახურებთ ასეთ ლამაზ დღეს და მოხარული ვარ, რომ ოჯახთან ერთად ჩართული ვარ ამ საზეიმო მსვლელობაში.   ბათუმი იზრდება და ვითარდება და ეს ერთმნიშვნელოვნია. ჩვენი ქალაქი ყოველთვის გამოირჩეოდა თავისი კოლორიტული ადგილებით, შესანიშნავი ხალხით და ეს დღესაც გრძელდება. ეს ქალაქი ვერ იარსებებს ჩემთვის უძვირფასესი ბათუმელების გარეშე და მე მინდა დიდი მადლობა გადავუხადო ყველას, ვინც ასე თავდაუზოგავად ზრუნავს საკუთარ ქალაქზე, რეგიონზე და ქვეყანაზე. ზუსტად ხალხია ამ ყველაფრის შემქნელიც და ბატონ-პატრონიც, მადლობა ბათუმელებს ამისათვის.

ჩემი მიზანიც სწორედ ის არის, რომ შენების და განვითარების ტემპები არ შევანელოთ, რომ გაგრძელდეს ჩვენი ქალაქის აღმშენებლობა. ჩვენი გუნდი ყველაფერს გააკეთებს იმისთვის, რომ ბათუმი წამყვანი ევროპული ქალაქების სიაში იყოს. “

ბათუმობასთან დაკავშირებით 2 დღის განმავლობაში დაგეგმილია თეატრალური წარმოდგენები, სახალხო მსვლელობები, ფოტოებისა და ხელნაკეთი ნივთების, ქართული ნაწარმის გამოფენა-გაყიდვა, ასევე სპორტული ღონისძიებები, თევზჭერა, ფილმის პრეზენტაცია, საპატიო ბათუმელების დაჯილდოების ცერემონიალი.

ბათუმობის  კულტურულ ღონისძიებათა პროგრამა მრავალფეროვანია. მემედ აბაშიძის ქუჩაზე ორი დღის განმავლობაში საინტერესო, განსხვავებული და მხიარული გარემო შეიქმნება.  ყველა ასაკობრივ კატეგორიაზე გათვლილი ღონისძიება, რამდენიმე ლოკაციას მოიცავს. 6 მაისის პარკში, კოლონადებთან პატარებისთვის საბავშვო კონცერტი გაიმართება, სადაც მათ განწყობაზე  ანიმატორები იზრუნებენ. სტუმრებს ადგილობრივი გასტრონომიის  დაგემოვნების საშუალებაც ექნებათ.

ჩატარდება ფოტოკონკურსი  „ჩემი ბათუმი“ , რომლის გამარჯვებულებსაც 4 სექტემბერს, საზეიმო ვითარებაში დაჯილდოვებენ. ერას ქუჩის მიმდებარედ მოეწყობა კოსტუმირებული  მსვლელობა. ბათუმის ხელოვნების ცენტრში კი  ქართული ესტრადის ვარსკლავების მონაწილეობით გალა კონცერტი „ბათუმობა 2016“ გაიმართება.

დღესასწაული 4 სექტემბერს ანბანის კოშკთან გრანდიოზული კონცერტით და საზეიმო ფოიერვერკით დაიხურება.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

მაკრონმა სტარმერს მადლობა გადაუხადა და საფრანგეთსა და ბრიტანეთს შორის თანამშრომლობის გაგრძელება გამოაცხადა

ბრიტანეთის პრემიერ-მინისტრი თანამდებობიდან გადადგა

პოლონეთმა ზელენსკის მიერ დაბრუნებული „თეთრი არწივის ორდენის“ მიღება დაადასტურა

გვარამია ენმ-ზე - ხალხი ერთ პარტიაშია და ბრიფინგებით, სატელევიზიო ეთერებით და სტატუსებით ელაპარაკება ერთმანეთს და წყევლის და აგინებს