აჭარის ჯანდაცვის სამინისტროსა და ბათუმის სახელმწიფო უნივერსიტეტს შორის მემორანდუმი გაფორმდა

2016-08-03 12:06:37, 872 ნახვა

რეგიონი

აჭარის ა/რ ჯანმრთელობისა და სოციალური დაცვის სამინისტროს, აჭარის ა/რ ფინანსთა და ეკონომიკის სამინისტროსა და ბათუმის შოთა რუსთაველის სახელმწიფო უნივერსიტეტს შორის ურთიერთთანამშრომლობის მემორანდუმი გაფორმდა.

ააჭრის ჯანდაცვის სამინისტროს ინფორმაციით, მემორანდუმი შპს ,,ქ. ბათუმის რესპუბლიკური - კლინიკური საავადმყოფო"-ს ტერიტორიაზე დაგეგმილი მრავალპროფილური სამედიცინო დაწესებულების ბათუმის შოთა რუსთაველის სახელმწიფო უნივერსიტეტის საბუნებისმეტყველო მეცნიერებათა და ჯანდაცვის ფაკულტეტის სასწავლო ბაზად გამოყენებისათვის შესაბამისი კონცეფციის შემუშავებას ითვალისწინებს.

მემორანდუმის ფარგლებში შენობის სწავლის პროცესისთვის აუცილებელი ტექნიკური აღჭურვა განხორციელდება.

შეთანხმება თითოეული მხარის წარმომადგენელთა მონაწილეობით სამუშაო ჯგუფის შექმნას გულისხმობს, რომელიც კონცეფციას შეიმუშავებს.

სამინისტროებისა და საგანმანათლებლო დაწესებულების თანამშრომლობა მნიშვნელოვნად გააუმჯობესებს აჭარის ა/რ ტერიტორიაზე ახალგაზრდა კვალიფიციური სამედიცინო კადრების მომზადების ხარისხს.

ამ ეტაპზე უკვე დასრულებულია რესპუბლიკური საავადმყოფოს ნულოვანი ნიშნული და პირველი და მეორე სართულის მშენებლობა მიმდინარეობს. აჭარის ფინანსთა და ეკონომიკის სამინისტროს ბიუჯეტით სამედიცინო დაწესებულების მშენებლობა 22 მლნ ლარით ფინანსდება. სამშენებლო სამუშაოებში 30 ადამიანია დასაქმებული და ეს ციფრი სამომავლოდ 60-მდე გაიზრდება.

მრავალპროფილური საავადმყოფო 170 საწოლზე იქნება გათვლილი. სამედიცინო დაწესებულება თანამედროვე ტექნიკით და ინვენტარით იქნება აღჭურვილი და პაციენტებს მაღალი ხარისხის მომსახურებას შესთავაზებს.

მრავალფუნქციური საავადმყოფოს მშენებლობა 2018 წლის გაზაფხულზე დასრულდება.რესპუბლიკური საავადმყოფო 1964 წელს წელს აშენდა და მისი მატერიალურ-ტექნიკური ბაზა დაახლოებით ბოლო 20 წელია ამორტიზირებულია.

(NS)

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან