თეთრიწყაროს მუნიციპალიტეტში 71 ეკომიგრანტ ოჯახს სახლი საკუთრებაში გადაეცა

2016-07-29 12:57:27, 591 ნახვა

საზოგადოება

საქართველოს მთავრობის განკარგულებით თეთრიწყაროს მუნიციპალიტეტში მცხოვრები 71 ეკომიგრანტი ოჯახი საცხოვრებელი სახლის მესაკუთრე გახდა.

ამის შესახებ „ექსპრესნიუსს“ ლტოლვილთა და განსახლების სამინისტროდან აცნობეს.

უწყების ცნობით, საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრმა სოზარ სუბარმა და ქვემო ქართლის გუბერნატორის პირველმა მოადგილემ კახაბერ გუგეშაშვილმა თეთრიწყაროს მუნიციპალიტეტის სოფელ წინწყაროში ეკომიგრანტი ოჯახებისთვის საკუთრებაში გადაცემული სახლები მოინახულეს.

2015 წელს, საქართველოს მთავრობის მიერ დამტკიცდა პროექტი „სტიქიური მოვლენების შედეგად დაზარალებული ოჯახების დროებით სარგებლობაში არსებული უძრავი ქონების საკუთრებაში გადაცემისათვის საჭირო ღონისძიებათა თაობაზე“. პროექტის ფარგლებში, მოხდა 2004-2009 წლებში შესყიდული საცხოვრებელ სახლებისა და მიწის ნაკვეთების აზომვითი ნახაზების შედგენა, მათი ხელახალი რეგისტრაცია სახელმწიფო საკუთრებად.

ცნობისთვის, ამ ეტაპზე, მთავრობის განკარგულებით საქართველოს მასშტაბით სახლი უკვე 285 ეკომიგრანტ ოჯახს დაუკანონდა. ეს პროცესი გრძელდება და უახლოეს მომავალში დაგეგმილია დამატებით 100 ოჯახისათვის საცხოვრებელი სახლის საკუთრებაში გადაცემა. წლის ბოლომდე კი, საკუთრების მფლობელი 1000-მდე ეკომიგრანტი ოჯახი გახდება.

საცხოვრებელი ფართების დაკანონების პროექტის პარალელურად, სამინისტრო 2013 წლიდან, სტიქიით დაზარალებული და გადაადგილებას დაქვემდებარებული ოჯახებისთვის საცხოვრებელი სახლების შესყიდვის პროგრამასაც ახორციელებს.

დევნილთა და განსახლების სამინისტრომ ეკომიგრანტი ოჯახებისთვის 2013 წლიდან დღემდე 300-მდე სახლში შეიძინა, მათ შორის ქვემო ქართლი რეგიონში უსაფრთხო გარემოში 27 ეკომიგრანტი ოჯახი განსახლდა.

გარდა ამისა, თეთრიწყაროს მუნიციპალიტეტში 35 დევნილი ოჯახისთვის საცხოვრებელი ფართების დაკანონების პროცესიც მიმდინარეობს.

(NS)