საქართველოს თავდაცვის სამინისტროსა და ბეისბოლისა და სოფტბოლის ეროვნული ფედერაციის ორგანიზებით, მიხეილ მესხის სახელობის სტადიონზე საქართველოს ეროვნულ ნაკრებსა და ამერიკელ საზღვაო ქვეითთა გუნდ „მეომრებს“ შორის ამხანაგური მატჩი გაიმართა.

საერთაშორისო სამშვიდობო მისიებში დაშავებული მეომრებისა და დაღუპული სამხედროების ხსოვნისადმი მიძღვნილ შეჯიბრებაში საქართველოს ნაკრებმა ამერიკელი საზღვაო ქვეითების გუნდი ანგარიშით 8:3 დაამარცხა.

ამხანაგურ მატჩს საქართველოს შეიარაღებული ძალების გენერალური შტაბის უფროსი ვახტანგ კაპანაძე, საქართველოში ამერიკის შეერთებული შტატების სრულუფლებიანი ელჩი იან კელი, საქართველოს ტერიტორიული მთლიანობისთვის ბრძოლებსა და საერთაშორისო სამშვიდობო მისიებში დაშავებული ქართველი სამხედროები, ასევე, საქართველოს სპორტისა და ახალგაზრდობის საქმეთა სამინისტროსა და საქართველოს ბეისბოლისა და სოფტბოლის ფედერაციის წარმომადგენლები დაესწრნენ.

ბეისბოლი და სოფტბოლი 12-წლიანი განშორების შემდეგ „ტოკიო-2020“-ის ოლიმპიურ თამაშებზე კვლავ უბრუნდება ოლიმპიური სპორტის სახეობათა დიდ ოჯახს. ამხანაგური მატჩი კი მნიშვნელოვანია საქართველოს ნაკრების გამოცდილებისათვის, რადგანაც საქართველოს ბეისბოლის ეროვნული ნაკრები იწყებს ბრძოლას აღნიშნული ასპარეზობის საგზურის მოსაპოვებლად, - ნაკრები ერთ თვეში ევროპის ჩემპიონატის საკვალიფიკაციო ტურნირზე გაემგზავრება.

განსაკუთრებით მნიშვნელოვანია, ასევე, მსგავს ღონისძიებებში საზოგადოების ჩართულობა და მხარდაჭერა იმ მეომრებისადმი, რომლებმაც მსხვერპლი გაიღეს ადამიანთა კეთილდღეობისთვის, დაშავდნენ ბრძოლებსა თუ სამშვიდობო მისიებში, მაგრამ, ამასთანავე, ცდილობენ არ დაკარგონ მოტივაცია და საბრძოლო სულისკვეთება.

ბეისბოლში საქართველოს ეროვნული და ახალგაზრდული ნაკრებებისა და აშშ-ის საზღვაო ქვეითთა გუნდებს შორის ამხანაგური მატჩი უკვე 6 წელია იმართება.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

საფრანგეთის საგარეო საქმეთა მინისტრმა განაცხადა, რომ ევროპელები აბუ-დაბიში უკრაინის საკითხზე მოლაპარაკებებში მიიღებენ მონაწილეობას

მოსკოვის რეგიონში გაყიდვების მხრივ სიდიდით მეორე ბენზინგასამართი სადგურების ქსელმა ფუნქციონირება შეწყვიტა

პოლონეთი კრაკოვში თავდასხმას ტერორისტულ აქტად აკვალიფიცირებს

Axios: თეთრი სახლის ადმინისტრაციის უფროსის მოადგილე რიჩარდ უოლტერსი ტრამპის ადმინისტრაციაში საკადრო ცვლილებების ფონზე თანამდებობას ტოვებს