თბილისში, სკოლაში ძალადობის ორგანიზების ბრალდებით ორი არასრულწლოვანი დააკავეს

2026-10-24 20:49:10, 745 ნახვა

სამართალი

სამართალდამცავებმა ჯგუფური ძალადობის ორგანიზების ბრალდებით ორი არასრულწლოვანი დააკავეს.

ისინი, სავარაუდოდ, თბილისის ერთ-ერთ სკოლაში მათივე თანატოლებზე ძალადობას გეგმავდნენ, რასთან დაკავშირებითაც, სხვადასხვა სოციალური ქსელების მეშვეობით კონტაქტობდნენ.

არსებული ინფორმაციით, სამართალდამცავებმა ჩხრეკის შედეგად ტაბელური იარაღი, ტყვიები, წიწაკის სპრეი, ხელთათმანები, ჩაფხუტი და დანა ამოიღეს.

"სანდო წყაროს ინფორმაციით ისინი ერთმანეთს ვიდეოზარით ეკონტაქტებოდნენ, ასევე კომუნიკაცია ჰქონდათ ტელეგრამისა და ტიკ-ტოკის არხების მეშვეობით.

როგორც ერთ-ერთი დაკავებულის მამამ სანდო წყაროს განუცხადა, ჩხრეკის შედეგად სამართალდამცველებმა სასტარტო პისტოლეტი, ტყვიები, წიწაკის სპრეი, ხელთათმანები, ჩაფხუტი და დანა ამოიღეს. მისივე თქმით, მოზარდები ერთმანეთში 2011 წელს ოსლოში მომხდარ ტერორისტულ აქტზე საუბრობდნენ და ასევე განიხილავდნენ რეალურ მოვლენებზე გადაღებულ მხატვრულ ფილმებს, რომლებშიც ძალადობრივი ქმედებები იყო ასახული". - წერს სანდო წყარო.

"ექსპრესნიუსს" შინაგან საქმეთა სამინისტრომ არასრულწლოვნების დაკავება დაუდასტურა. უწყების ცნობით, გამოძიება სისხლის სამართლის კოდექსის 18-225-ე მუხლით მიმდინარეობს.

Patreon P მხარი დაუჭირე "ექსპრესნიუსს" →

ავტორი: ელენე გვიმრაძე, ექსპრესნიუსის რეპორტიორი 2018 წლიდან