ევროკომისიის პრეზიდენტმა ურსულა ფონ დერ ლაიენმა 20 მარტს თქვა, რომ უნგრეთის წინააღმდეგობის მიუხედავად, ევროკავშირი გამონახავს გზებს, რათა უკრაინას 90 მილიარდი ევროს ოდენობის სესხი გადასცეს.

ეს განცხადება მან საფრანგეთის პრეზიდენტ ემანუელ მაკრონთან და გერმანიის კანცლერ ფრიდრიხ მერცთან ერთობლივი პრესკონფერენციის დროს გააკეთა.

"უკრაინისთვის 90 მილიარდი ევროს ოდენობის სესხის გადაცემის საკითხზე, მინდა, გადავიდე.

გადაწყვეტილება მიღებულ იქნა ევროპის საბჭოში დეკემბერში. არსებობდა ერთი პირობა - რომ სამი ქვეყანა არ მიიღებდა მონაწილეობას ამ შეთანხმებაში. ეს პირობა შესრულებულია.

ნათლად ვთქვათ, რა მოცემულობაში ვართ: სესხი კვლავ დაბლოკილია, რადგან ერთი ლიდერი არ ასრულებს საკუთარ სიტყვას. თუმცა მინდა გავიმეორო ის, რაც უკვე ვთქვი კიევში - ჩვენ ამას მაინც შევასრულებთ, ამა თუ სხვა გზით", - თქვა ურსულა ფონ დერ ლაიენმა.

ამავე თემაზე კომენტარი გააკეთეს ფრიდრიხ მერცმა და ემანუელ მაკრონმა.

"ჩვენ არ უნდა წავიდეთ კომპრომისზე.

სახელმწიფოებისა და მთავრობების ლიდერები შეთანხმდებიან გადაწყვეტილებაზე და ის აუცილებლად უნდა შესრულდეს. წინააღმდეგ შემთხვევაში, ეს გარკვეულწილად აზრს უკარგავს თავად ჩვენს შეთანხმებებს.

ამიტომ ჩემთვის "გეგმა B" არ არსებობს, რადგან "გეგმა A" უნდა შესრულდეს. საბჭოს სანდოობა სწორედ ამაზეა დამოკიდებული", - თქვა ემანუელ მაკრონმა

"მე ასეთი შთაბეჭდილება მრჩება, რომ ჩემი კოლეგები, რომლებიც ევროპის საბჭოს წევრები ბევრად უფრო დიდი ხანია არიან, ვიდრე მე, ღრმად შეშფოთებულები არიან იმით, რაც ახლა ხდება.

ეს წევრ სახელმწიფოებს შორის ერთმანეთისადმი ერთგულების პრინციპის სერიოზული დარღვევაა, რაც ევროკავშირის რეპუტაციას აზიანებს.

აქამდე ამ ფორმით ასეთი არაფერი მომხდარა. მტკიცედ ვარ დარწმუნებული, რომ ეს ღრმა რეპუტაციულ კვალს დატოვებს", - თქვა ფრიდრიხ მერცმა.

უნგრეთის პრემიერმა ვიქტორ ორბანმა ევროპული საბჭოს შეხვედრის დაწყებამდე თქვა, რომ უნგრეთი არ დაუშვებს უკრაინისთვის სასარგებლო გადაწყვეტილების მიღებას იქამდე, სანამ კიევი მილსადენ დრუჟბას გავლით ნავთობის ტრანზიტს არ აღადგენს.

აღსანიშნავია, რომ ევროკავშირის ქვეყნებიდან, მხოლოდ უნგრეთისა და სლოვაკეთის ნავთობგადამამუშავებელი ქარხნები იყენებენ დრუჟბას მილსადენით შესულ რუსულ ნავთობს - თუმცა, უკრაინის გავლით დრუჟბას ნავთობსადენით 27 იანვრის შემდეგ ნავთობი აღარ მიეწოდებათ.

უკრაინის განცხადებით, ამის მიზეზი ნავთობსადენზე რუსეთის თავდასხმაა, ხოლო სლოვაკეთი და უნგრეთი უკრაინას ნავთობის მიწოდების განზრახ შეჩერებაში ადანაშაულებენ.

ავტორი: ექსპრესნიუსი,

სოციალური ქსელები

ყირიმში, ნავთობბაზისა და ბორნის დაბომბვის შემდეგ, მათ შეწყვიტეს საწვავის გაყიდვა და დახურეს ქერჩის გადასასვლელი

აფხაზეთის საოკუპაციო რეჟიმი - თბილისიდან მშვიდობა მხოლოდ ძალის გამოუყენებლობის შესახებ შეთანხმებაა

ალბანეთში ათიათასობით ადამიანმა კუშნერ-ივანკა ტრამპთან დაკავშირებული კურორტის წინააღმდეგ საპროტესტო აქცია გამართა

მოვითხოვთ, 4 ოქტომბრის საქმის საფუძვლიან და ობიექტურ გადახედვას - მეცნიერებათა აკადემია