ბათუმში, 14 იანვარს, სასამართლომ აქტივისტებისა და ჟურნალისტების საქმეზე გადაწყვეტილებები მიიღო. მოსამართლე გულიკო კაჟაშვილმა 12-დღიანი პატიმრობა მიუსაჯა ახალგაზრდა აქტივისტებს – ლუკა ნაცვლიშვილსა და ელიზბარ ჩხიკვაძეს. ისინი 13 იანვარს, აჭარის მთავრობის სახლთან მიმდინარე ხალხმრავალ საპროტესტო აქციაზე დააკავეს.

დღესვე, პარტია „დროას“ აქტივისტის შუშანა მაცაბერიძისა და მოქალაქე გიორგი კაკალაძის სასამართლოც გაიმართა. სასამართლომ გიორგი კაკალაძეს 10-დღიანი პატიმრობა, შუშანა მაცაბერიძეს კი 12-დღიანი პატიმრობა შეუფარდა.

ამავე პროცესზე 8-დღიან პატიმრობაში დატოვეს აქციის კიდევ ერთი მონაწილე, ლევან ხორავა.

სასამართლომ ასევე 12-დღიანი პატიმრობა მიუსაჯა „ბათუმელების“ ოპერატორს, გურამ მურვანიძეს, რომელიც პროფესიული მოვალეობის შესრულების დროს დააკავეს ბათუმის პოლიციის უფროსის, ირაკლი დგებუაძის, მითითებით.

დაკავებულებს პოლიციის კანონიერი მოთხოვნისადმი დაუმორჩილებლობას ედავებიან.

მოსამართლის გადაწყვეტილებები მძიმე შეფასებებს იწვევს. აქტივისტები სასამართლო პროცესებს „უსამართლოს“ უწოდებენ:

„მოსამართლეები წინასწარ მიღებულ გადაწყვეტილებებს ასრულებენ. ისინი რეჟიმის დავალებებს ემორჩილებიან,“ – განაცხადა აქტივისტმა ლარა ქარცივაძემ.

სასამართლო პროცესებზე ისმოდა შეძახილები: „მონებო“, „რუსებო“, ხოლო დაკავებულთა წინააღმდეგ პოლიციის მოწმეები იდენტურ ჩვენებებს იძლეოდნენ, რასაც საქმეში არსებული მტკიცებულებები ეწინააღმდეგებოდა.

ამავე დღეს, სასამართლომ ორთვიან პატიმრობაში დატოვა „ბათუმელები/ნეტგაზეთის“ დამფუძნებელი მზია ამაღლობელი, რომელიც 11 იანვარს დააკავეს.

საპროტესტო აქციებზე, რომლებიც 11-13 იანვარს ბათუმში გაიმართა, პოლიციამ საერთო ჯამში 20 პირი დააკავა.

ავტორი: ექსპრესნიუსი,

სოციალური ქსელები

საშუალო სკოლის მოსწავლეების საპროტესტო აქციები საფრანგეთში: რატომ გადაიზრდება მშვიდობიანი საპროტესტო აქციები ძალადობაში?

ერდოღანის რეჟიმმა დააკავა ჟურნალისტი რომელმაც 2024 წელს საქართველოში ლგბტქ+ ორგანიზაციებზე სტატია დაწერა

რეპრესიული კანონების გამო, პანკისის ხეობაში საგანმანათლებლო სასწავლო ცენტრი დაიხურა სადაც ქართულ ენას გაძლიერებულად ასწავლიდნენ

ესტონეთის ახალი თავდაცვის დოქტრინა არმიას ავალდებულებს, რუსეთი საზღვარზე შეაჩეროს.