დედაქალაქის მერი კახა კალაძე, მის მოადგილეებთან, ირაკლი ბენდელიანთან და ანდრია ბასილაიასთან ერთად, ვერის პარკის სარეაბილიტაციო სამუშაოებს გაეცნო. 

პარკის სრულმასშტაბიანი რეაბილიტაციისთვის მომზადდა წინასაპროექტო კვლევები და დეტალური დიზაინის პროექტი. მის მომზადებაში ჩართული იყო საზოგადოება, რითიც შეიქმნა თანამონაწილეობითი დაგეგმარების პრეცედენტი. საპროექტო სამუშაოების ღირებულებამ 700 000 ლარს შეადგინა.

„სარეაბილიტაციო სამუშაოები აქტიურად მიმდინარეობს. 4 ჰექტარზე მეტი ტერიტორიაა. აქ იყო ძალიან მძიმე მდგომარეობა. მას შემდეგ, რაც გაშენდა ეს ტერიტორია, ამ ტიპის სამუშაოები არ ჩატარებულა და ძირეულად ხდება განახლება. პირველ რიგში, გასუფთავდა ტერიტორია, ირგვება ხე-მცენარეები, მიმდინარეობს მიწისქვეშა კომუნიკაციების მოწესრიგება, გაკეთდება ღამის განათება, ატრაქციონების სივრცე ბავშვებისთვის ცალკე იქნება გამოყოფილი, ასევე იქნება ძაღლების სასეირნო სივრცე, გაკეთდება ორი გადმოსახედი, სანაპიროსთან დამაკავშირებელი საფეხმავლო ბილიკები აღდგება, მოწესრიგდება და განათდება. ჭადრაკის სასახლის ავარიული შენობა-ნაგებობის რეაბილიტაციას ვიწყებთ მომდევნო წლიდან. გარდა ამისა, აქვე არის ჩოგბურთის კორტები, რომელიც სავალალო მდგომარეობაშია და მომავალი წლიდან მის განახლებასაც შევუდგებით. გვინდა, პარკის რეაბილიტაციის სამუშაოები სექტემბერში დავასრულოთ და დედაქალაქის კიდევ ერთი, გამწვანებული, მოწესრიგებული სივრცე შეემატება“, - განაცხადა კახა კალაძემ. 

ადგილზე ასევე იმყოფებოდნენ საქართველოს პარლამენტის წევრი დავით კაჭარავა, მთაწმინდის რაიონის გამგებელი დავით კირკიტაძე და გარემოს დაცვის საქალაქო სამსახურის უფროსი პაატა ტოგონიძე. 

ვერის პარკი დაცულია კულტურული მემკვიდრეობის უძრავი ძეგლის სტატუსით და მისი ძირეული გარდაქმნა ან შეცვლა არ იგეგმება. შესაბამისად, პროექტის ფარგლებში განსაკუთრებული ყურადღება მიექცა, არსებული გეგმარებისა და აქტივობების შენარჩუნებას, მათ უკეთ ორგანიზებას,  გაუმჯობესებას და ახალი, გარემოსთვის შესაფერისი ფუნქციების ინტეგრაციას.

სარეაბილიტაციო სამუშაოების ფარგლებში მოეწყობა 2 საბავშვო მოედანი 1-3 და 3-12 წლის ბავშვებისთვის, ასევე ძაღლების სასეირნო სივრცე,  გარე განათების სისტემა, საფეხმავლო ბილიკები, შადრევანი, სასმელი წყლის სოკოები, საპარკე ავეჯი, ფანჩატური, სპორტული მოედანი, საფეხბურთო მოედანი,  ბელვედერი, ადმინსტრაციული შენობა და საპირფარეშო. 

ამჟამად პარკს არ გააჩნია სანიაღვრე სისტემა, მოძველებულია სარწყავი სისტემა,  უსისტემოდ არის განაწილებული მიწისზედა გაზმომარაგებისა და წყალმომარაგების მილები. შესაბამისად,  რეაბილიტაციის ფარგლებში სრულიად განახლდება თითოეული ზემოთ ჩამოთვლილი სისტემა, პარკს დაემატება სანიაღვრე, ხოლო უსისტემო გაყვანილობები შეიცვლება და დაიმალება გრუნტში.პარკში არსებული მრავალწლოვანი ხე-ნარგავები შენარჩუნდება, ამასთან, ახალი გამწვანებული სივრცეებიც გაჩნდება. სარეაბილიტაციო სამუშაოები 2025 წლის შემოდგომაზე დასრულდება.

ინფორმაციას თბილისის მერია ავრცელებს.

ავტორი: NS (სტატია დაფინანსებულია),

სოციალური ქსელები

არაგვზე ხიდის მშენებლობის გამო, სად შეიზღუდება წყალმომარაგება 36 საათით - GWP-ს განცხადება

მათიკაშვილი - პირდაპირი მსგავსებაა სექტანტურ მიმდინარეობასა და იმ ე.წ. პროტესტს შორის, რომელიც საქართველოში მიმდინარეობს

ბოჭორიშვილი: საქართველო მტკიცედ დგას უკრაინელი ხალხის გვერდით

სი ძინპინმა განაცხადა, რომ ჩინეთი და აშშ პარტნიორები უნდა იყვნენ და არა მეტოქეები