საქართველოს რეგიონული განვითარებისა და ინფრასტრუქტურის სამინისტროს საავტომობილო გზების დეპარტამენტის ინფორმაციით, კვირის ბოლოს გახდება ცნობილი, როდის აღდგება რიკოთის საგზაო მონაკვეთზე ავტოსატრანსპორტო საშუალებების მოძრაობა.

როგორც საავტომობილო გზების დეპარტამენტის თავმჯდომარემ, გიორგი წერეთელმა დღეს გამართულ საგანგებო ბრიფინგზე განაცხადა, აღმოსავლეთისა და დასავლეთის დამაკავშირებელ მაგისტრალზე ტრანსპორტის მოძრაობის განახლება დამოკიდებულია გეოლოგიურ და გეოფიზიკურ კვლევებზე, რომელთა პირველადი, წინასწარი შედეგები ცნობილი კვირის ბოლოსთვის გახდება.

"მოძრაობის შეწყვეტა გამოწვეული იყო უკიდურესი აუცილებლობიდან, ვინაიდან თოვლის დნობის შედეგად, გზასთან სიახლოვეს, დაახლოებით 200 მეტრში, განვითარდა მეწყრული პროცესები. შესაბამისი დაკვირვების შედეგად, გამოვლინდა ბზარების ზრდის და აღნიშნულ მონაკვეთზე მეწყრული პროცესების განვითარების და ჩამოსვლის ტენდენცია. ამიტომ, სპეციალისტების დაკვირვების შემდეგ და მათი რეკომენდაციით, მივიღეთ გადაწყვეტილება შეგვეზღუდა რიკოთის მონაკვეთზე ავტოტრანსპორტის მოძრაობა. 

ამ ეტაპზე რიკოთის 149-ე კმ-ზე გზის გაფართოვების სამუშაოები დასრულებულია, მიმდინარეობს შესაბამისი გეოლოგიური კვლევებისათვის გზის მიყვანის სამუშაოები, ასევე, აქტიურად მიმდინარეობს გეოლოგიური, გეოფიზიკური კვლევები საერთაშორისო და ადგილობრივი სპეციალისტების მიერ. კვირის ბოლოსთვის უკვე ცნობილი იქნება პირველადი, წინასწარი შედეგები, რომელიც მოგვცემს საშუალებას ვიმსჯელოთ როგორც საფრთხეების დონეზე, ასევე ავტოსატრანსპორტო საშუალებების მოძრაობის აღდგენის შესაძლებლობაზე", - აცხადებენ საავტომობილო გზების დეპარტამენტში.

შეგახსენებთ, რიკოთის საგზაო მონაკვეთზე ავტოტრანსპორტის მოძრაობა 30 მარტს შეწყდა. მოძრაობა  გადართულია გომი-საჩხერე-ჭიათურა-ზესტაფონის გზაზე.

ავტორი: ექსპრესნიუსი,

სოციალური ქსელები

მოსკოვის სასამართლომ კენედების ოჯახის წევრს დაუსწრებლად პატიმრობა მიუსაჯა

კოლუმბიის პრეზიდენტი - მიწისძვრის შემდეგ 265 ადამიანი დაიღუპა და 3 494 დაშავდა, უგზო-უკვლოდ დაკარგულად ითვლება 496

ნარკოდანაშაულის ბრალდებით 135 პირი დააკავეს, მათ შორის ნარკორეალიზაციაში სხვადასხვა ფორმით ჩართული 55 პირია

ივანიშვილის წარმომადგენელი იონათამიშვილი აფხაზეთში ბენზინის მიწოდებაზე კითხვების გამო ოპოზიციის აკრძალვას ითხოვს