2022-12-05 16:32:55, 1188 ნახვა

---

მელია - ღარიბაშვილი ვერ გაიგებს რამ შეიძლება წაგიყვანოს ფრონტის ხაზზე, მას ცხოვრებაში ბატონის მსახურების მეტი არაფერი გაუკეთებია

პრემიერად წოდებული ღარიბაშვილი შეურაცხყოფს გმირებს - ამბობს, რომ ისინი პარტიამ წაიყვანა ომში! არ ესმის და ვერც გაიგებს რა არის თავისუფლების წყურვილი, როდესაც მას ბატონის მსახურების მეტი არაფერი გაუკეთებია ამ ცხოვრებაში! - ამის შესახებ "ერთიანი ნაციონალური მოძრაობის" თავმჯდომარე ნიკა მელია აცხადებს.

მელია, სოციალურ ქსელში უკრაინაში დაღუპულ ქართველ მებრძოლებთან დაკავშირებით, საქართველოს პრემიერ-მინისტრის განცხადებას ეხმაურება და ამბობს, რომ ირაკლი ღარიბაშვილმა სამი დღის შემდეგ მისამძიმრებით გმირები შეურაცხყო და სამხედრო პატივით დაკრძალვა, პრაქტიკულად, დაამადლა.

"33 ქართველი მებრძოლი დაიღუპა უკრაინაში რუსეთის წინააღმდეგ ბრძოლაში. პრემიერად წოდებული ღარიბაშვილი შეურაცხყოფს გმირებს - ამბობს, რომ ისინი პარტიამ წაიყვანა ომში! თუმცა, სხვაგვარად მას ვერც წარმოუდგენია, არ ესმის და ვერც გაიგებს რა არის თავისუფლების წყურვილი და რა ძალამ შეიძლება წაიყვანოს ადამიანი ფრონტის წინა ხაზზე. როგორ უნდა გაიგოს, ან როგორ უნდა ესმოდეს ეს, როდესაც მას ბატონის მსახურების მეტი არაფერი გაუკეთებია ამ ცხოვრებაში! 

დიახ, გმირები ბრძოლის ველზე დაეცნენ იმიტომ, რომ იცოდნენ, ვინ არის მტერი და იცოდნენ, როგორ მოიპოვება თავისუფლებაა! საქართველოში დღეს არის "მშვიდობა" არა იმიტომ, რომ რუსული ოცნების მთავრობა არის კეთილგონიერი, არამედ იმიტომ, რომ  უკრაინელი და ქართველი გმირები, რუსეთს უკრაინაში არა მხოლოდ აკავებენ, არამედ ამარცხებენ. 

პრემიერად წოდებულმა, მხოლოდ მას შემდეგ, რაც საზოგადოების აღშფოთება და რისხვა იწვნია, მხოლოდ სამი დღის შემდეგ მიუსამძიმრა გმირების ოჯახებს. ასეთ სამძიმარს, ჯობდა საერთოდ არ ეთქვა! ამ სამძიმრით შეურაცხყო გმირები, მათი ბრძოლა და იდეალები. გმირები პრაქტიკულად დაადანაშაულა, პრაქტიკულად დაამადლა სამხედრო პატივით დახვედრა! ქართველი გმირების სახელები ოქროს ასოებით ჩაიწერება ისტორიაში.  ეს ადამიანი კი, ასევე ღირსეულად დაიკავებს თავის კუთვნილ ადგილს თავისი ამხანაგების - ფილიპე მახარაძისა და სერგო ორჯონიკიძის გვერდით! დიდება გმირებს!" - წერს მელია "ფეისბუქის" საკუთარ გვერდზე.

შეგახსენებთ, საქართველოს პრემიერ-მინისტრმა დღევანდელ მთავრობის სხდომაზე უკრაინაში დაღუპული მებრძოლების ოჯახებს მიუსამძიმრა. ირაკლი ღარიბაშვილმა ამავე სხდომაზე განაცხადა, რომ ქართველი მებრძოლები უკრაინაში "ომის პარტიის" წარმომადგენლებს მიჰყავთ.

3 დეკემბერს უკრაინაში, ბახმუტთან ბრძოლაში კიდევ 5 ქართველი მებრძოლი დაიღუპა. რუსულ აგრესიას ბადრი მარკელია, რომეო კვარაცხელია, რომეო ფიჩხაია, მერაბ ალადაშვილი და ავთო რურუა ემსხვერპლნენ. 24 თებერვლის შემდეგ, ომს სულ 33 ქართველი მებრძოლი შეეწირა. 

---

ავტორი: ექსპრესნიუსი,

---

დღის თემა

მთავარი თემა

ინტერვიუ - ექსკლუზივი