ილია ელოშვილი: იმისთვის, რომ მოლოდინი არ მოუწიოთ ოჯახებს, „აუტიზმის სპექტრის დარღვევის მქონე ბავშვთა აბილიტაციის პროგრამის“ დაფინანსება 5 მლნ ლარით გავზარდეთ

2021-06-21 23:31:35, 1503 ნახვა

კომენტარი

დედაქალაქის მერის მოადგილე ილია ელოშვილმა, თბილისის სოციალური პოლიტიკის მიმართულებით განხორციელებული პროექტების ანგარიშის წარდგენისას, ბავშვთა სამედიცინო და სოციალური დახმარების მუნიციპალურ პროგრამებზე ისაუბრა.

ილია ელოშვილმა ერთ-ერთ მნიშვნელოვან პროგრამად „აუტიზმის სპექტრის დარღვევის მქონე ბავშვთა აბილიტაციის პროგრამა“ დაასახელა. მისი თქმით, ამ პროგრამით 1 375 პირი სარგებლობს.

„ჩვენ გავზარდეთ ამ პროგრამის დაფინანსება და ვცდილობთ, აღარ გვქონდეს რიგები. ჩვენ პულსზე გვიდევს ხელი, რომ არ იყვნენ მომლოდინე ოჯახები ან თუ იქნება, ისინი მყისიერად ჩაერთონ პროგრამაში. ამისთვის 5 მილიონით გაიზარდა ეს დაფინანსება“, - აღნიშნა მერის მოადგილემ.

თბილისის მერის მოადგილემ ასევე, სოციალურად დაუცველი ოჯახების ბავშვებისა და მრავალშვილიანი ოჯახებისთვის განკუთვნილ პროგრამებზე ისაუბრა. ილია ელოშვილის განცხადებით, დემოგრაფიული ინტერესებიდან გამომდინარე, ერთ-ერთი მნიშვნელოვანი მიმართულებაა სოციალურად დაუცველი მრავალშვილიანი ოჯახების დახმარება.

„სოციალურად დაუცველი ოჯახებისთვის ჩვენ გვაქვს პროგრამები მოსწავლე-ახალგაზრდობის სასახლეში, სახელოვნებო სკოლებში, სპორტულ დარბაზებში და საცურაო აუზებზე. 9000-ზე მეტი სოციალურად დაუცველი ბავშვი სარგებლობს ამ პროგრამებით და სრულიად უფასოდ იღებს იმ სიკეთეს, რაც ნიშნავს ჯანსაღი ცხოვრების წესს.

ამასთან, ჩვენ გვაქვს სოციალურად დაუცველი ოჯახების დახმარების პროგრამა. დემოგრაფია სერიოზული პრობლემაა ჩვენთვის. ამიტომ, გადაწყვეტილება იყო მიღებული, რომლის მიხედვითაც მეორე ახალშობილზე 500 ლარით ვაფინანსებთ, მესამე შვილზე - 800, მეოთხეზე - 1000, ხოლო მეხუთე და მომდევნო შვილზე - 1500 ლარით. ამ პროგრამაში 24 500-ზე მეტი ბავშვია ჩართული. გარდა ამისა, მრავალშვილიანი ოჯახების თითოეულ ბავშვზე, ყოველთვიურად გამოყოფილია 50-ლარიანი ფინანსური დახმარება“, - განაცხადა ილია ელოშვილმა.

ილია ელოშვილმა შეზღუდული შესაძლებლობების მქონე ბავშვების მხარდამჭერ პროგრამებზეც ისაუბრა.

„ამ მხრივ მნიშვნელოვანია 18 წლამდე ასაკის შშმ პირთათვის 800 ლარით დახმარების პროგრამა. ამას 100-ზე მეტი პირი იღებს. ასევე, ბავშვთა და მოზარდთა საკურორტო მომსახურების პროგრამა. პირადად მაქვს ნანახი, რამდენად ბედნიერები არიან ეს ბავშვები გამგზავრების წინ“, - განაცხადა ილია ელოშვილმა.

Patreon P მხარი დაუჭირე "ექსპრესნიუსს" →

ავტორი: NS (სტატია დაფინანსებულია),