2021-02-27 18:48:51, 562 ნახვა

---

შსს - მივმართეთ „ენმ“-ს წარმომადგენლებს, რომ სამინისტროში გამოცხადებულიყვნენ და ოფისიდან ამოღებული ტექნიკური მოწყობილობები გადაეცემოდათ, მათ უარი განაცხადეს

„მივმართეთ „ენმ“-ს წარმომადგენლებს, რომ სამინისტროში გამოცხადებულიყვნენ და ოფისიდან ამოღებული ტექნიკური მოწყობილობები გადაეცემოდათ, მათ უარი განაცხადეს“, - ამის შესახებ შინაგან საქმეთა სამინისტრო განცხადებას ავრცელებს.

განცხადებაში ასევე აღნიშნულია, რომ პარტიას სამინისტროსგან გაეგზავნა ოფიციალური წერილი კანონიერი წარმომადგენლის გამოყოფის მიზნით, ვისაც აღნიშნული ტექნიკა გადაეცემა.

„2021 წლის 23 თებერვალს, შინაგან საქმეთა სამინისტროს ცენტრალური კრიმინალური პოლიციის დეპარტამენტის თანამშრომლებმა, სამართალდამცველებისთვის ჯგუფურად წინააღმდეგობის გაწევის ფაქტზე, სისხლის სამართლის კოდექსის 353-ე მუხლის მეორე ნაწილით მიმდინარე გამოძიების ფარგლებში, თბილისში, კახეთის გზატკეცილზე მდებარე „ერთიანი ნაციონალური მოძრაობის“ ცენტრალური ოფისიდან სხვადასხვა სახის ტექნიკური მოწყობილობები ამოიღეს და დალუქეს, რადგან არსებობდა საქმისათვის მნიშვნელოვანი მტკიცებულებითი ინფორმაციის განადგურების ან/და სამომავლოდ მოპოვებისთვის ხელის შეშლის საფრთხე.

ჩატარებული საგამოძიებო მოქმედებები სასამართლომ კანონიერად სცნო.

შინაგან საქმეთა სამინისტროს თანამშრომლებმა „ერთიანი ნაციონალური მოძრაობის“ წარმომადგენლებს აცნობეს, რომ გამოცხადებულიყვნენ სამინისტროში და დაუბრუნდებოდათ პარტიის ოფისიდან ამოღებული ტექნიკური მოწყობილობები, რაზეც მათ უარი განაცხადეს.

ამის შემდგომ, შინაგან საქმეთა სამინისტრომ პარტიას ოფიციალური წერილი გაუგზავნა, სადაც აღნიშნულია, რომ გამოყონ კანონიერი წარმომადგენელი, რომელსაც ოფისიდან ამოღებული ტექნიკური საშუალებები გადაეცემა“, - ვკითხულობთ განცხადებაში.

---

ავტორი: NS (სტატია დაფინანსებულია),

---

დღის თემა

მთავარი თემა

ინტერვიუ - ექსკლუზივი