საქართველო-აზერბაიჯანის საზღვარზე ქართველი მესაზღვრის მძევლად აყვანაში ბრალდებულ გიორგი იჩუკაიძეს თბილისის საქალაქო სასამართლომ აღკვეთი ღონისძიების სახით პატიმრობა შეუფარდა.

როგორც სხდომის შემდეგ ბრალდებულის ადვოკატმა ლევან მარსაგიშვილმა აღნიშნა, დაცვის მხარე სასამართლოს გადაწყვეტილებას არ ეთნახმება, რადგან მისი თქმით, აღკვეთის ღონისძიების გამოყენების საფუძველი არ არსებობდა.

„არ ვეთანხმებით სასამართლოს გადაწყვეტილებას, რადგან არ არსებობდა აღკვეთის ღონისძიების გამოყენების ფორმალური საფუძველი. იქიდან გამომდინარე, რომ ვითომდა ის თავისუფლებაში ყოფნის შემთხვევაში საინტერესო ინფორმაციას გაანადგურებს. ის ნებაყოფლობით მონაწილეობს საგამოძიებო მოქმედებებში“, - განაცხადა ადვოკატმა.

რაც შეეხება ბრალდების მხარის პოზიციას, როგორც პროკურორმა გიორგი ხაჩიძემ აღნიშნა, დასტურდება, რომ ბრალდებული სიცოცხლისა და ჯანმრთელობისათვის საშიში ძალადობით მესაზღვრეებისგან იარაღს ითხოვდა.

„თვითონაც ახსენა, რომ იარაღის მოთხოვნა იყო მესაზღვრეების მიმართ. ასევე აღსანიშნავია, რომ მან მოითხოვა იარაღი. დასტურდება ისიც, რომ მას ხელში ეკავა იარაღთან ერთად ხელყუმბარაც და სიცოცხლისა და ჯანმრთელობისათვის საშიში ძალადობით ითხოვდა იარაღს მესამე პირისაგან“, - განაცხადა პროკურორმა.

შეგახსენებთ, გიორგი იჩუკაიძე სამართალდამცველებმა ცეცხლსასროლი იარაღის მართლსაწინააღმდეგო შეძენა-შენახვა-ტარებისა და მძევლად ხელში ჩაგდების ბრალდებით, საქართველო-აზერბაიჯანის სახმელეთო საზღვრის შეუთანხმებელ მონაკვეთზე 14 იანვარს დააკავეს.

შსს-ს ცნობით, ბრალდებულმა ცეცხლსასროლი იარაღისა და ხელყუმბარის გამოყენების მუქარით, ქართველი მესაზღვრე აიძულა, გადაადგილებულიყვნენ საზღვრის შეუთანხმებელი მონაკვეთის მიმართულებით. ცინციდენტის განმავლობაში გ.ი.-მ ცეცხლსასროლი იარაღიდან რამდენიმეჯერ გაისროლა.

გამოძიება საქართველოს სისხლის სამართლის კოდექსის 236-ე მუხლის მე-3 და მე-4 ნაწილებით და 144-ე მუხლის მე-2 ნაწილის "ი" ქვეპუნქტით მიმდინარეობს.

ავტორი: ექსპრესნიუსი,

სოციალური ქსელები

კრიტიკის ცეცხლში მოყოლილი ისტორიაში ყველაზე ძვირადღირებული მსოფლიო ჩემპიონატი ფეხბურთში

აშშ-ის სასამართლომ ტრამპის 1.8 მილიარდი დოლარის ოდენობის კომპენსაციის ფონდი დაბლოკა

პაპუაშვილი - პარლამენტში პარტია „საქართველოსთვის“ სახელით მყოფი ხალხი უნდა მიხვდეს, რომ გაქცეული გახარია ამათ დასცინის

ბენზინის დეფიციტის გამო, რუსეთი თვითმფრინავებისთვის საწვავის პრობლემებია