თბილისის მერიის ეკონომიკური განვითარების საქალაქო სამსახურის ორგანიზებით, სასტუმრო „რუმსში“, უცხოურ და ადგილობრივ კომპანიებს შორის, ტურიზმის მიმართულებით B2B შეხვედრები გაიმართა. ღონისძიებას თბილისის მერის მოადგილე სოფიო ხუნწარია და ეკონომიკური განვითარების საქალაქო სამსახურის უფროსი ანდრია ბასილაია ესწრებოდნენ.

„დედაქალაქის მერია აქტიურად არის ჩართული ამ სექტორის განვითარებაში და მოხარული ვართ, რომ გვაქვს პატივი, ვუმასპინძლოთ 40-მდე საერთაშორისო ტურისტულ და საპრომოუტერო კომპანიას 10-მდე ქვეყნიდან. ღონისძიებაში ასევე მონაწილეობენ მცირე და საშუალო სიდიდის ადგილობრივი ტურისტული და ივენთების ორგანიზატორი კომპანიები, რომლებიც სამუშაო შეხვედრებს გამართავენ სტუმარ ორგანიზაციებთან და საშუალება ექნებათ დაამყარონ საქმიანი ურთიერთობები, ხელი შეუწყონ ვიზიტორთა ნაკადების ზრდას და პოპულარიზაცია გაუწიონ თბილისის ტურისტულ პოტენციალს“, - განაცხადა სოფიო ხუნწარიამ.

ანდრია ბასილაიამ ტურისტული პოტენციალისა და ამ მიმართულებით მერიის ღონისძიებების შესახებ პრეზენტაცია წარადგინა. საქართველოს ტურისტული პროდუქტების შესახებ ისაუბრა ტურიზმის ეროვნული ადმინისტრაციის წარმომადგენელმაც.

„სულ ცოტა ხნის წინ დავიწყეთ ამ საკითხზე მუშაობა, მანამდე ამ მიმართულებას ფარავდა ტურიზმის ეროვნული ადმინისტრაცია, რომელთანაც ახლაც მჭიდრო თანამშრომლობა გვაქვს. დედაქალაქს აქვს მრავალი პროდუქტი, რომელიც შეუძლია შესთავაზოს მოგზაურებს და სჭირდება სწორი პოზიციონირება“, - განაცხადა ანდრია ბასილაიამ.

ღონისძიების მეორე ნაწილში ადგილობრივი ტურისტული კომპანიების წარმომადგენლები შეხვდნენ სხვადასხვა ქვეყნის 35  ტურისტული კომპანიის წარმომადგენელს და საშუალება ჰქონდათ დაემყარებინათ საქმიანი კავშირები, განეხილათ სამომავლო თანამშრომლობის პირობები და საერთო ტურისტული პაკეტების შექმნის პერსპექტივები, როგორც ზამთრის პერიოდისათვის, ასევე მთელი წლის გათვალისწინებით.

პროექტის ფარგლებში, თბილისს საერთაშორისო ღონისძიებების ორგანიზატორები და პრომოუტერები ეწვივნენ, რომლებმაც შეხვედრები გამართეს ადგილობრივ პროდიუსერებთან და მოინახულეს თბილისში არსებულ საფესტივალო სივრცეები მომავალში საერთაშორისო ღონისძიებების თბილისში ჩატარების მიზნით.

სტუმრები იმ სამიზნე ქვეყნებიდან ჩამოვიდნენ, სადაც თბილისის ტურისტული პოტენციალის პოპულარიზაცია უნდა მოხდეს. კერძოდ, ლიეტუვადან, ლატვიიდან, იტალიიდან, სლოვაკეთიდან, უკრაინიდან, ყაზახეთიდან, ბელარუსიდან, სერბეთიდან, უზბეკეთიდან, ყირგიზეთიდან, ისრაელიდან და ა.შ.

ავტორი: NS (სტატია დაფინანსებულია),

სოციალური ქსელები

„ლინდსი შოკირებული იქნებოდა“ - რესპუბლიკელები ტრამპს რუსეთისთვის სანქციების შესახებ გადაწყვეტილების გამო აკრიტიკებენ

კობახიძე მედიას ცენზურას აქტიურად აგრძელებს და მედიასაშუალებებს სამართლებრივი დევნით ემუქრება

ქართული ოცნება – ივანიშვილმა შეაჯამა წარსულში გუნდში არსებული კორუფციული გამოწვევები და აღნიშნა, რომ პრემიერის, გუნდისა და ძალოვანი სისტემის ეფექტური მუშაობა

მოსკოვში დრონების თავდასხმების შედეგად 350-ზე მეტი რეისი გაუქმდა და გადაიდო