„ის გიჟი [სააკაშვილი] რომ გირეკავთ სტარტზე დგახართ“ - ბიუროს სხდომაზე დეპუტატები ერთმანეთს დაუპირისპირდნენ

2019-06-25 19:34:06, 1227 ნახვა

პოლიტიკა

პარლამენტის ბიუროს სხდომა, სადაც "ნაციონალური მოძრაობის" წევრის, დეპუტატ ნიკა მელიას მანდატის შეჩერებაზე მსჯელობენ, ხმაურის ფონზე მიმდინარეობს.

სხდომაზე "ევროპული საქართველოს" წევრმა სერგო რატიანმა უკმაყოფილება გამოთქვა, მელიას პასუხისგებაში მიცემის გამო. მისივე თქმით, არასწორია როდესაც "ქართული ოცნება" ნიკა მელიას აბრალებს 20-21 ივნისს განვითარებულ მოვლენებს.

რატიანის გამოსვლამ ფრაქცია "ქართული ოცნების" თავმჯდომარის მამუკა მდიანარაძის გაღიზიანება გამოიწვია.

"ნუ დემაგოგობ, ახლა ზიხარ, ტყუილს ამბობ და საზოგადოება შეცდომაში შეგყავს", - განაცხადა მდინარაძემ.

კამათის ფონზე სერგო რატიანმა ბიუროს სხდომა დატოვა. "ევროპული საქართველოს" წევრის შემდეგ, სხდომა "ნაციონალური მოძრაობის" ერთ-ერთმა ლიდერმა რომან გოცირიძემაც დატოვა.

გასვლამდე, გოცირიძემ აღნიშნა, რომ ბიურო დაკომპლექტებულია ბიძინა ივანიშვილის ხალხით, რომელიც დეპუტატის მანდატის შეჩერებაზე დადებით გადაწყვეტილებას მიიღებს.

"თქვენ ასრულებთ ივანიშვილის დაკვეთას", - მიმართა გოცირიძემ საპარლამენტო უმრავლესობის წევრებს.

მას მამუკა მდინარაძემ უპასუხა:

"ჩვენ არ ვართ "ნაციონალური მოძრაობა", თქვენნაირი სისხლისმსმელები არ ვართ. ის გიჟი [სააკაშვილი] რომ გირეკავთ, სტარტზე დგახართ. ჩვენ ასე არ ვიქცევით. ყველას გვაქვს ჩვენი აზრი, რომელსაც ვაფიქსირებთ", - განაცხადა მდინარაძემ.

შეგახსენებთ, პროკურატურამ „ნაციონალური მოძრაობის“ ერთ-ერთი ლიდერი, ნიკა მელია სისხლის სამართლის პასუხისგებაში მისცა. უწყებამ პარლამენტს წინადადებით მიმართა, რომლითაც საკანონმდებლო ორგანოს მელიას დაკავების თაობაზე თანხმობას სთხოვს.