პარლამენტის პლენარული სხდომა ცხარე კამათის და დაპირისპირების ფონზე დაიწყო.

ოპოზიცია სხდომის დღის წესრიგში შს მინისტრის, გიორგი გახარიას გადადგომისა და აქციის დროს დაკავებული მოქალაქეების გათავისუფლების საკითხის შეტანას ითხოვდა.

„არის თუ არა დღის წესრიგში რეზოლუცია, რომელიც ასახავს გარეთ მდგომი ახალგაზრდების მოთხოვნას, რომელიც ჩვენ წარვადგინეთ, გახარიას გადაყენების შესახებ. ჩვენ მიგვაჩნია, რომ დღეს პარლამენტში მსჯელობა ამ ჩვეულებრივ საკითხებზე უბრალოდ წარმოუდგენელი, თუ ჩვენ არ განვიხილავთ გახარიას პასუხისმგებლობის სახითხს. შეიტანეთ დღის წესრიგში აქციის დროს დაკავებულების გათავისუფლების და შინაგან საქმეთა მინისტრის გადაყენების საკითხი!“, - განაცხადა „ევროპული საქართველოს“ წევრმა ელენე ხოშტარიამ.

ამის შემდეგ განცხადება „ნაციონალური მოძრაობის“ წევრმა, თინა ბოკუჩავამ გააკეთა და პარლამენტის ვიცე-სპიკერს მოთხოვნების შესრულებისკენ მოუწოდა:

„თქვენ რა გგონიათ ქალბატონო თამარ, რომ იმ სკამში სადაც გავრილოვი იჯდა თქვენ წამოსკუპდებით და აქ ყველაფერი რუტინის მიხედვით წავა?! მოვითხოვთ ოპოზიცია, რომ განიხილოთ გახარიას გადადგომის საკითხი. ეს არ არის ის, რასაც მე ვითხოვ, ან ერთი პარტია ითხოვს, ამას ითხოვს საზოგადოება, მრავალათასიანი მიტინგი, რომელიც მიმდინარეობს უკვე მრავალი დღეა. ჩვენ არ მოგცემთ პროცედურაში შესვლის შესაძლებლობას. თქვენ უნდა განიხილოთ გახარიას გადადგომის საკითხი!მოგიწოდებთ ქალბატონო თამარ, თუ არ გსურთ დაადგეთ ირაკლი კობახიძის გზას!“, - მიმართა ბოკუჩავამ თამარ ჩუგოშვილს.

ოპოზიციის წარმომადგენლების განცხადებებს დარბაზში უმრავლესობის დეპუტატების გაღიზიანება და ხმაური მოჰყვა, რის შემდეგაც ტექნიკური შესვენება გამოცხადდა.

შესვენების შემდეგ, ენმ-ის და „ევროპული საქართველოს“ წევრებმა სხდომას პროტესტის ნიშნად დატოვეს.

"ევროპული საქართველოს" ერთ-ერთმა ლიდერმა გიგა ბოკერიამ განმარტა, რომ პარლამენტი არ აპირებს გახარიასთან დაკავშირებული რეზოლუციის პროექტი განიხილოს და სწორედ ამიტომ, მათ მიიღეს გადაწყვეტილება სხდომა დატოვონ, რადგან მასში მონაწილეობის აზრს ვერ ხედავენ.

ავტორი: ელენე გვიმრაძე, ექსპრესნიუსის რეპორტიორი 2018 წლიდან

სოციალური ქსელები

სტამბოლში სტენდაფ კომიკოსი ერდოღანზე ხუმრობის გამო დააკავეს

რუსეთის ბენზინგასამართ სადგურებზე რიგები ახლა კოსმოსიდანაც ჩანს

ნავთობგადამამუშავებელი ქარხნების დაბომბვებმა ნავთობისა და გაზის ბიუჯეტის შემოსავლები ტრილიონი რუბლით შეამცირა

ოკუპირებული ცხინვალის რეგიონის „საპრეზიდენტო“ არჩევნების ე.წ. ვადამდელი თარიღად 18 სექტემბერი დადგინდა