ჩვენი მთავარი სტრატეგიის მთავარი მოტივია ის, რომ საქართველო იყოს რეგიონის ეკონომიკური ცენტრი და რაც ძალიან მნიშვნელოვანია, განათლებისა და ინოვაციებისცენტრი, ჩვენ ასე წარმოგვიდგენია ჩვენი ქვეყანა, - ამის შესახებ საქართველოს პრემიერ-მინისტრმა მამუკა ბახტაძემ ტელეკომპანია „იმედის" ეთერში, აშშ-ში ვიზიტის შეჯამებისას განაცხადა.

 მთავრობის მეთაურის თქმით, სწორედ აღნიშნული საკითხი იყო საუბრის მთავარი თემა შეხვედრებზე, რომელიც მისი აშშ-ში ვიზიტის ფარგლებში გაიმართა.

 „ჩვენ გვქონდა შეხვედრები იმ ქალაქებში, სადაც ძირითადად კონცენტრირებულები არიან ამერიკული კომპანიები, რომლებიც აქტიურები არიან საერთაშორისო ბაზრებზე და ახორციელებენ მსხვილ ინვესტიციებს. ჩვენ მივიღეთ ძალიან დადებითი უკუკავშირები. მე არ მსურს, მოვლენებს წინ გავუსწრო, მაგრამ რამდენიმე კომპანია აპირებს კონკრეტული ინვესტიციების განხორციელებას. მინდა ხაზი გავუსვა, რომ ჩვენ გვაქვს სრული მხარდაჭერა იმ ეროვნული იდეის გარშემო, რასაც ჰქვია განათლება. ჩვენ საქართველო წარმოგვიდგენია როგორც აშშ-ის ერთ-ერთი პარტნიორი ცენტრი ინოვაციებში. ჩვენ ამას აუცილებლად მივაღწევთ. ჩვენს კრიტიკოსებს შეიძლება ჩემი ეს განცხადება ხმამაღალი მოეჩვენოთ, მაგრამ რამდენიმე თვის წინ მე იგივეს ვისმენდი, როდესაც ვამბობდი, რომ საქართველო შეძლებს მაღალტექნოლოგიური პროდუქციის ექსპორტს, მაგრამ დღეს ჩვენ ვაშენებთ ორ ქარხანას - მზის პანელების, რომელიც ამერიკის ბაზარს მოამარაგებს და ელექტრომობილების. სწორედ ეს არის ჩვენი პასუხი მსგავს კრიტიკაზე", - განაცხადა მამუკა ბახტაძემ.

 პრემიერის თქმით, საქართველოში მაღალტექნოლოგიური ინვესტიციები უზრუნველყოფს  მაღალანაზღაურებადი სამუშაო ადგილების შექმნას.

 „სწორედ ამიტომ, ჩვენ განსაკუთრებულად ორიენტირებულები ვართ იმაზე, რომ ამ დარგში მეტი ამერიკული კომპანია იყოს საქართველოში წარმოდგენილი. ასევე მინდა გამოვყო კრიტიკული ინფრასტრუქტურის განვითარება. ეს ეხება ტრანსპორტს და ენერგეტიკას. ძალიან საინტერესო წინადადებები აქვთ ამერიკელ მეწარმეებს საქართველოში ტურიზმის განვითარების თვალსაზრისით", - განაცხადა მამუკა ბახტაძემ.

მთავრობის მეთაურის თქმით, მიმდინარეობს ასევე მუშაობა პირდაპირი ავიამიმოსვლის დაწყებაზე.

 „ შემიძლია მთელი პასუხისმგებლობით განვაცხადო, რომ ძალიან მნიშვნელოვან ინვესტიციებს ველოდებით აშშ-დან უახლოეს მომავალში. ჩვენ ველოდებით ინვესტიციებს ისეთ სექტორში, რომელშიც აქამდე არ ყოფილა. ჩვენ მივიტანეთ მთავარი გზავნილი - საქართველოში ინვესტიცია არ ნიშნავს მხოლოდ საქართველოს ბაზარზე ოპერირებას. ეს ნიშნავს ძალიან მსხვილ გეოგრაფიაში ბიზნესის კეთებას, ვინაიდან, სწორედ საქართველოა ძალიან ბევრი ქვეყნისთვის კარიბჭე, რომ იყოს ჩართული საერთაშორისო ვაჭრობაში", - განაცხადა მამუკა ბახტაძემ.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

ლუკას სიპერი - საქართველოს მთავრობა თავის მოსახლეობას აშორებს ევროპისკენ მიმავალი გზისგან, მაგრამ ეს მხოლოდ დროის ამბავია

დევიდ მაკალისტერი- ყველა ძირითადი ოპოზიციური პარტიის აკრძალვისკენ სწრაფვით, რეჟიმმა ავტორიტარული მმართველობისკენ კიდევ ერთი გულგრილი ნაბიჯი გადადგა

ევროკომისარი როსვოლი - ევროკავშირი ქართულ ოცნებას მოუწოდებს, შეცვალოს თავისი საზიანო ქმედებები და ანტიდემოკრატიული კანონმდებლობა, გაათავისუფლოს თვითნებურად დაკავებული ოპოზიციის წევრები

მალგორჟატა გოშევსკა - ივანიშვილი საქართველოში დემოკრატიას ანადგურებს და ქვეყანას რუსული ტიპის დიქტატურისკენ მიაქანებს