„ჩვენ მივიღებთ ზომებს იმისთვის, რომ დაჩქარდეს ამ კანონპროექტის განხილვა და გვექნება ფართო კონსულტაციები ყველა დაინტერესებულ მხარესთან",- ამის შესახებ საქართველოს პარლამენტის თავმჯდომარემ „მაუწყებლობის შესახებ"კანონში  შესატან ცვლილებებთან დაკავშირებით საუბრისას განაცხადა.

 ცვლილებები, რომლებიც საქართველომ ასოცირების ხელშეკრულებით ნაკისრი ვალდებულებების ფარგლებში, 2019 წლის 1 ივლისამდე უნდა მიიღოს,  სიძულვილის ენის, ომის პროპაგანდისა და არასრულწლოვნების მავნე ზეგავლენისგან დაცვას ითვალისწინებს.

ირაკლი კობახიძე საქართველოს კომუნიკაციების ეროვნული კომისიის თავმჯდომარის, კახა ბექაურის ინიციატივას გამოეხმაურა და განაცხადა, რომ ამ მიმართულებით, გადაწყვეტილებები დროულად არის მისაღები.

„აქტუალური საკითხია. ამ თემაზე ჩვენ გვექნება მსჯელობა  სამუშაო ჯგუფის ფორმატში, სარჩევნო კუთხით, თუმცა, ამ საკითხის მნიშვნელობა საარჩევნო განზომილებას სცილდება. ინიცირებულია შესაბამისი კანონპროექტი, განიხილება შესაბამის წამყვან კომიტეტში. გეთანხმებით, რომ გაჩერებული იყო თვეების განმავლობაში ეს კანონპროექტი. ჩვენ მივიღებთ ზომებს იმისთვის, რომ დაჩქარდეს ამ კანონპროექტის განხილვა და გვექნება ფართო კონსულტაციები ყველა დაინტერესებულ მხარესთან. ვადასტურებ, რომ ბატონი კახა ბექაურის მიერ გაჟღერებული ინიციატივა არის ძალიან მნიშვნელოვანი, აქტუალური და დროულად არის გადაწყვეტილებები მისაღები ამ მიმართულებით. წამყვან კომიტეტში ჯერჯერობით არ განხილულა, მიზეზებსაც მოვიძიებთ და შევეცდებით, რომ დავაჩქაროთ ამ საკითხის განხილვა",- განაცხადა პარლამენტის თავმჯდომარემ.

ირაკლი კობახიძის თქმით, ამოცანაა, მოიძებნოს საუკეთესო ბალანსი სიძულვილის ენასა და გამოხატვის თავისუფლებას შორის. პარლამენტის თავმჯდომარის შეფასებით, ეს არის საკითხი, რომელიც შესწავლას და კონსულტაციებს საჭიროებს.

„სიძულვილის ენაც  არის გამოხატვის თავისუფლების შემადგენელი ნაწილი, მაგრამ ამოცანა ზუსტად  ის არის, რომ  მოვძებნოთ საუკეთესო ბალანსი ადამიანის სურვილს შორის, რომ სიძულვილით ილაპარაკოს და მეორე მხრივ, გამოხატვის თავისუფლებას შორის. სიძულვილის ენა  პრობლემაა ჩვენს მედიაში და ზოგადად, საზოგადოებაში. როცა ვსაუბრობთ, იგივე, პოლიტიკურ კულტურაზე, ვიდრე იქნება ამ მასშტაბით წარმოდგენილი მედიაში სიძულვილის ენა ან პოლიტიკაში სიძულვილის ენა, წარმოუდგენელია საუბარი პოლიტიკური სისტემის კონსოლიდაციაზე. ეს არის საზოგადოების პრობლემა.  ეს არის ის საკითხი, რომელიც საჭიროებს შესწავლას, კონსულტაციებს და რა თქმა უნდა, ამის საფუძველზე მივიღებთ გადაწყვეტილებას.

როდესაც ეხები გამოხატვის თავისუფლებას, განსაკუთრებული სიფრთხილეა საჭირო, თუმცა, დამეთანხმებით, რომ სიძულვილის ენა არის ის საკითხი, რომელიც საჭიროებს განსაკუთრებულ ყურადღებას და საჭიროების შემთხვევაში, შეიძლება, გამოხატვის თავისუფლება შეიზღუდოს კიდეც.  მთავარია, გამოხატვის თავისუფლების შეზღუდვა ლეგიტიმურ ჩარჩოებში იყოს მოქცეული",- განუცხადა ირაკლი კობახიძემ ჟურნალისტებს.

ავტორი: ელენე გვიმრაძე, ექსპრესნიუსის რეპორტიორი 2018 წლიდან

სოციალური ქსელები

ლუკას სიპერი - საქართველოს მთავრობა თავის მოსახლეობას აშორებს ევროპისკენ მიმავალი გზისგან, მაგრამ ეს მხოლოდ დროის ამბავია

დევიდ მაკალისტერი- ყველა ძირითადი ოპოზიციური პარტიის აკრძალვისკენ სწრაფვით, რეჟიმმა ავტორიტარული მმართველობისკენ კიდევ ერთი გულგრილი ნაბიჯი გადადგა

ევროკომისარი როსვოლი - ევროკავშირი ქართულ ოცნებას მოუწოდებს, შეცვალოს თავისი საზიანო ქმედებები და ანტიდემოკრატიული კანონმდებლობა, გაათავისუფლოს თვითნებურად დაკავებული ოპოზიციის წევრები

მალგორჟატა გოშევსკა - ივანიშვილი საქართველოში დემოკრატიას ანადგურებს და ქვეყანას რუსული ტიპის დიქტატურისკენ მიაქანებს