მოსამართლეთა განწესების პროცესთან დაკავშირებით ადვოკატთა ასოციაციამ რეზოლუცია მიიღო

2019-02-03 17:37:06, 1667 ნახვა

სამართალი

მართლმსაჯულების სისტემაში არსებული გამოწვევებისა და უზენაესი სასამართლოს მოსამართლეთა განწესების პროცესთან დაკავშირებული საკითხების თაობაზე მიღებულ იქნა ადვოკატთა საერთო კრების სპეციალური რეზოლუცია.

რეზოლუციაში ნათქვამია, რომ სასამართლო სისტემაში ჩამოყალიბებული მმართველობის მანკიერი
ფორმა, სისტემის ხელმძღვანელობითი პოზიციების ვიწრო და ურთიერთდაკავშირებული
ჯგუფის ხელში კონცენტრაცია, თვითმმართველობის დაბალი ხარისხი და
ინდივიდუალური მოსამართლის როლის უგულვებელყოფა მნიშვნელოვნად აზიანებს
სასამართლო სისტემის დამოუკიდებლობასა და მის მიმართ საზოგადოების ნდობას;

"ვინაიდან, უზენაესი სასამართლოს, როგორც დოქტრინალურ საკასაციო ინსტანციას,
განსაკუთრებული როლი აქვს დამოუკიდებელი სასამართლო ხელისუფლების
განმტკიცების, ერთგვაროვანი სასამართლო პრაქტიკის ჩამოყალიბებისა და ხარისხიანი
მართლმსაჯულების განხორციელების პროცესში;
საქართველოს ადვოკატთა ასოციაციის წევრთა რიგგარეშე საერთო კრება მოუწოდებს
საქართველოს პარლამენტს:
უზრუნველყოს იუსტიციის უმაღლესი საბჭოს დაკომპლექტების წესის იმგვარი
რეფორმა, რომლითაც შეიზღუდება თანამდებობრივი პოზიციების მქონე მოსამართლეთა
საბჭოს წევრად არჩევის შესაძლებლობა, ხოლო საბჭოს არამოსამართლე წევრებად
სავალდებულო კვოტის ფარგლებში გამწესდებიან საქართველოს ადვოკატთა ასოციაციისა
და იურიდიული პროფესიის მაღალი რეპუტაციის მქონე წარმომადგენლები.
არ დაუშვას უზენაესი სასამართლოს მოსამართლეებად იმ კანდიდატთა გამწესება,
რომელთაც წლების განმავლობაში ეკავათ და უკავიათ ხელმძღვანელობითი პოზიციები
სასამართლო სისტემაში და პასუხისმგებელნი იყვნენ სასამართლო ხელისუფლების
დამოუკიდებლობის დაცვასა და ხარისხიანი და სანდო მართლმსაჯულების
დამკვიდრებაზე; " - ნათქვამია რეზოლუციის ტექსტში.
ადვოკატები მოითხოვენ, რომ შეიქმნას უზენაესი სასამართლოს მოსამართლეობის კანდიდატთა მოსმენისა და
შერჩევის იმგვარი ფორმატი, რომელიც უზრუნველყოფს ადვოკატთა ასოციაციის,
აკადემიური წრეების და სამოქალაქო საზოგადოების ქმედით ჩართულობას კანდიდატის
პროფესიული რეპუტაციისა და სამოსამართლო თვისებების შეფასების მიზნით.