„მე არ ვდუმვარ, პირველივე წუთებიდან, რაც დაიწყო აქცია, ჩემი წარმომადგენლები, ფაქტიურად 24-სათიან რეჟიმში აკვირდებოდნენ აქციას“, - ამის შესახებ საქართველოს პრეზიდენტმა გიორგი მარგველაშვილმა რუსთაველის გამზირზე განვითარებულ მოვლენებთან დაკავშირებით განაცხადა.

მისი შეფასებით, საზოგადოებამ დაინახა როგორც პოლიტიკური, ისე ადმინისტრაციული ქმედებების სრული კრახი და უამრავი შეცდომა.

„ჩვენ ვნახეთ როგორც პოლიტიკური ისე ადმინისტრაციული ქმედებების სრული კრახი და შეცდომების მთელი წყება, რომელიც დაიწყო ამ სპეცოპერაციით და შემდეგაც გრძელდებოდა. რანაირად შეიძლება ჩვენ მოვახერხოთ რომ რამდენიმე საათში მივიდეთ სამოქალაქო დაპირისპირების ზენიტამდე, დღემდე კითხვის ნიშნად რჩება და ამას სჭირდება პირდაპირი პასუხები. რანაირად შეიძლება რამდენიმე საათში მოვახერხოთ მისვლა იმ წერტილამდე, რომ კინაღამ სამოქალაქო დაპირისპირების ზღვარზე აღმოვჩნდით. ჩვენი მიზანი იყო და რჩება ის, რომ შევინარჩუნოთ გამოხატვისა და სიტყვის თავისუფლება, ამავე დროს, მოვახერხოთ და წესრიგი იქნას შენარჩუნებული როგორც ქუჩებში, ასევე საზოგადოებრივ-პოლიტიკურ პროცესში“, - განაცხადა გიორგი მარგველაშვილმა.

ამასთან, მან მადლობა გადაუხადა იმ სამართალდამცველებს, რომლებიც აქციის მონაწილეების უსაფრთხოებას იცავდნენ.

„გუშინდელი საღამოს ვითარებისთვის მე მადლობა მინდა ვუთხრა იმ პატრულის წარმომადგენლებს, რომლებიც იქ იდგნენ და ასრულებდნენ თავის მისიას, არ მომხდარიყო დაპირისპირება ორ აქციას შორის“, - განაცხადა პრეზიდენტმა.

შეგახსენებთ, 12-13 მაისს, რუსთაველის გამზირზე ათასობით ადამიანი ღამის კლუბებში ჩატარებულ სპეცოპერაციას აპროტესტებდა. ისინი პრემიერის და შს მინისტრის გადადგომას, ასევე სპეცოპერაციაზე პასუხისმგებელი პირების დასჯას ითხოვდნენ. ვითარება ადგილზე მას შემდეგ დაიძაბა, რაც სოციალურ ქსელში 9 მაისის მემორიალზე ცეკვის კადრები გავრცელდა. აღნიშნულმა საზოგადოების ნაწილის გაღიზიანება გამოიწვია, რის გამოც, მათ კონტრაქციები გამართეს. ისინი გუშინ მთელი დღის განმავლობაში ცდილობდნენ მემორიალთან მისვლას, თუმცა სამართალდამცველები ამის საშუალებას არ აძლევდნენ, რათა საპირისპირო აქციის მონაწილეებს შორის დაპირისპირება არ მომხდარიყო. პოლიციასთან დაპირისპირების დროს კონტრაქციის 20-მდე მონაწილე დააკავეს. გარდა ამისა, დაშავდა ერთი სამართალდამცველი. მას შემდეგ, რაც პარლამენტის შენობასთან შინაგან საქმეთა მინისტრი გიორგი გახარია მივიდა და აქციის მონაწილეებთან შეთნახმებას მიაღწია, პარლამენტის მიმდებარე ტერიტორია გათავისუფლდა. მოგვიანებით, ტერიტორია კონტრაქციის წარმომადგენლებმაც დატოვეს.

ავტორი: ,

სოციალური ქსელები

ირაკლი ღარიბაშვილი კლინიკაში იყო გადაყვანილი

რუმინეთის საგარეო უწყება გმობს რუმინული ჯგუფი Morandi ოკუპირებულ სოხუმში გასამართ კონცერტს

პროკურატურა - ნია იმნაძემ მის მეგობრებს ალექსანდრე გაბაშვილს და გიორგი მალანიას უთხრა, თითქოსდა მისი მასწავლებელი, გიგა ავალიანი ზედმეტ ყურადღებას იჩენდა მის მიმართ

გიგა ავალიანის საქმეზე ჯგუფურად ჯანმრთელობის განზრახ მძიმე დაზიანების წაქეზების ფაქტზე ნია იმნაძეს და განსაკუთრებით მძიმე დანაშაულის შეუტყობინებლობის ფაქტზე ანასტასია ბერუაშვილს ბრალდება წარუდგინეს