პრემიერი: ფასდაუდებელია ის გავლენა,რომელიც აშშ-ის მიერ დაფინანსებულმა საგანმანათლებლო პროგრამებმა ჩვენს ცხოვრებაზე იქონია

2017-04-28 20:13:48, 1515 ნახვა

საზოგადოება

ფასდაუდებელია ის გავლენა, რომელიც აშშ-ის მიერ დაფინანსებულმა საგანმანათლებლო პროგრამებმა იქონია ჩვენს ცხოვრებაზე და დემოკრატიული საქართველოს განვითარებაზე, - ამის შესახებ საქართველოს პრემიერ-მინისტრმა გიორგი კვირიკაშვილმა თბილისის სახელმწიფო უნივერსიტეტში საქართველო აშშ-ის დიპლომატიური ურთიერთობების 25-ე წლისთავისადმი მიძღვნილ ღონისძიებაზე განაცხადა.

პრემიერმა, ამერიკაში სწავლის პერიოდი გაიხსენა და აღნიშნა, რომ იქ შეძენილი გამოცდილება ძალიან მნიშვნელოვანი აღმოჩნდა საბანკო კარიერაში.

„ნება მომეცით, გაგიზიაროთ ჩემი გამოცდილება. ეს მოხდა 1995 წელს, როცა პირველად გავიცანი ამერიკა. იმ წელს, ზოგიერთ თქვენგანს შეიძლება ახსოვს კიდეც, კალიფორნიის დევისის უნივერსიტეტის პროფესორი, სილიციუმის ველის კონცეფციის სულისჩამდგმელი და სილიციუმის ველის ბანკის დამფუძნებელი რობერტ მედრისი ჯორჯ შულცთან ერთად ჩამოვიდა საქართველოში, რათა აქ დაეარსებინა აშშ-ის მიერ დაფინანსებული ტრენინგის პირველი პროგრამა, რომელსაც ერქვა საქართველოს ბიზნეს ტრენინგის პროგრამა პირველ წელს და საქართველოს საბანკო საქმის ტრენინგის პროგრამა მეორე წელს, რომელშიც მე მივიღე მონაწილეობა. წილად მხვდა პატივი, შეიძლება ითქვას, რომ უფრო გამიმართლა, ვყოფილიყავი იმ ათ ქართველ სტუდენტს შორის, რომლებიც სამოქალაქო ომისა და ნგრევის შემდეგ პირდაპირ აშშ-ში ჩავიდნენ. ძალიან რთულია იმ ემოციების გადმოცემა, რომლებიც ჩვენ ყველას დაგვეუფლა ამერიკაში ჩასვლისთანავე. ერთი თვის განმავლობაში ჩვენ კალიფორნიის დევისის უნივერსიტეტში ვესწრებოდით ლიდერობის, საბაზრო ეკონომიკის ლექციებს. შემდეგ დაგვაწყვილეს და გაგვაგზავნეს სხვადასხვა ქალაქში, ზოგი ლოს-ანჟელესში, ზოგიც სან-ფრანცისკოში. ორი ჩვენგანი კი, ჩემი ჩათვლით, აღმოვჩნდით ფრეზნოში, კალიფორნიის შტატის სოფლის მეურნეობის ცენტრში. ჩემი ერთ-ერთი მეგობარი ხუმრობდა კიდეც, კახეთიდან ჩამოვედი აქ, ვენახებით გარშემორტყმულ ადგილასო. ჩვენ ვეხუმრებოდით, რომ ეს ადგილი ზუსტად მასზე იყო მორგებული“,-აღნიშნა კვირიკაშვილმა.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან