ზურაბ პატარაძე დედაენის დღისადმი მიძღვნილ ღონისძიებას დაესწრო

2017-04-14 13:39:35, 1117 ნახვა

რეგიონი

ბათუმში დედა ენისადმი მიძღვნილი ღონისძიება დღეს ილია ჭავჭავაძის ძეგლთან გაიმართა. ღონისძიებას აჭარის ა.რ. მთავრობის თავმჯდომარე დაესწრო.

ზურაბ პატარაძემ სკოლის მოსწავლეებთან ერთად ყვავილებით შეამკო დიდი ქართველი საზოგადო მოღვაწის ძეგლი და იქ შეკრებილ საზოგადოებას 14 აპრილი, დედაენის დღე მიულოცა.

,,ქართველ ხალხს ვულოცავ ამ დიდებულ დღეს. ეს დღე არის ჩვენი ქვეყნის სიძლიერე, ჩვენი ქვეყნის მომავალი. დღეს ჩვენ შევიკრიბეთ ილია ჭავჭავაძის ძეგლთან და მოსწავლეებთან ერთად აღვნიშნეთ ეს ეროვნული დღესასწაული", - აღნიშნა ზურაბ პატარაძემ.

14 აპრილისადმი მიძღვნილ სადღესასწაულო ღონისძიებაში ბათუმის საჯარო სკოლების მოსწავლეები და პედაგოგები მონაწილეობდნენ, მათ ყვავილებით შეამკეს ილია ჭავჭავაძის ძეგლი და წაიკითხეს ლექსები.

დღესვე, სკოლის მოსწავლეები თეთრი მაისურებით შეუერთდნენ ღონისძიებას სლოგანებით - "დაიცავი დედა ენა! არა ბარბარიზმს!". აქციის მიზანს ქართული ენის თვითმყოფადობის დაცვა და გაფრთხილება წარმოადგენდა.

ღონისძიებას ესწრებოდა აჭარის განათლების, კულტურისა და სპორტის მინისტრის მოადგილეები სულიკო თებიძე და მირიან ქათამაძე.

1978 წელს ქართველმა საზოგადოებამ მტკიცე პროტესტი გამოთქვა საბჭოთა ხელისუფლების გადაწყვეტილების წინააღმდეგ, რომლის თანახმადაც ქართული ენა სახელმწიფო ენის სტატუსს კარგავდა. სტუდენტებმა, ქართული კულტურისა და ხელოვნების მოღვაწეებმა, საქართველოს მოსახლეობასთან ერთად, მასობრივი საპროტესტო შეკრებები და გამოსვლები დიწყეს. დაძაბული ვითარების გამო, ოფიციალური მოსკოვი იძულებული გახდა, დაეთმო და კონსტიტუციაში ცვლილება აღარ შევიდა, ხოლო 14 აპრილი "დედაენის დღედ" გამოცხადდა.

(NS)