იუსტიციის სამინისტროს  საჯარო რეესტრის ეროვნულმა სააგენტომ,  ეროვნული სანავიგაციო სისტემის შექმნის პროექტის ფარგლებში, ქალაქ ფოთში საველე აღწერითი სამუშაოები დაასრულა.

სააგენტოს ინფორმაციით, პროექტის ფარგლებში,    სრულად აღწერილია 42 კვადრატული კმ ფართობი,  შეიქმნა საზოგადოებრივი მნიშვნელობის გეოგრაფიული მონაცემების ბაზა, რომელშიც 1294  ობიექტია შეტანილი.   მათ შორის კვების და განთავსების 350 ობიექტი, განათლების და ჯანდაცვის 88 ობიექტი, 71 სამთავრობო და არასამთავრობო ორგანიზაცია,  61 საფინანსო დაწესებულება (ბანკები, ბანკომატები, მიკრსაფინანსო ორგანიზაციები), 414 სავაჭრო  ობიექტი, 130 ობიექტი მომსახურებისა და ტურიზმის სფეროდან,  კულტურის, დასვენებისა და გართობის 94 ობიექტი, 52 სპორტული მოედანი და სტადიონი, სატრანსპორტო სფეროს 220 ობიექტი,  600 საგზაო ნიშანი და სხვ. აღწერილ მონაცემებს ვიზუალიზაციისთვის  შესაბამისი ფოტომასალა აქვს თანდართული.

ფოთში შავი ზღვის აუზის ერთ-ერთი უდიდესი ნავსადგური და თავისუფალი ინდუსტრიული ზონაა განთავსებული, რაც  სატრანზიტო  და სატრანპორტო თვალსაზრისით  ქალაქს საკვანძო მნიშვნელობას ანიჭებს.  მდიდარი კოლხური კულტურისა და ღირსშესანიშნავი ადგილების სიმრავლის  გამო,   ფოთს ტურიზმის  განვითარების თვალსაზრისითაც ხელშესახები პოტენციალი გააჩნია.

ნავიგაციის პროექტის ფარგლებში ქ. ფოთის გარდა  დასრულებულია ბათუმისა და ქობულეთის აღწერა-ინვენტარიზაცია. ამ ეტაპზე  სამუშაოები ანაკლიასა და ურეკში მიმდინარეობს.   შავი ზღვის სანაპირო ზოლის სანავიგაციო  მონაცემების შექმნა-დამუშავება კი მაისში, ტურისტული სეზონის დაწყებამდეა დაგეგმილი.

საჯარო რეესტრი საველე-საინვენტარიზაციო სამუშაოების შედეგად მიღებულ გეოგრაფიულ მონაცემებს საერთაშორისო სტანდარტების  შესაბამისად დაამუშავებს და ეროვნული სანავიგაციო სისტემის  შესაქმნელად გამოიყენებს.

პარალელურად, საჯარო რეესტრი ნავიგაციის ელექტრონული აპლიკაციის შექმნაზე მუშაობს, რომელშიც საველე აღწერით მიღებული გეომონაცემები აიტვირთება. ელექტრონული აპლიკაცია მოხმარებელს   ინფორმაციის მოძიებას, ადგილმდებარეობის იდენტიფიცირებას და დანიშნულების ადგილამდე მისასვლელი ოპტიმალური მარშრუტის შერჩევას გაუადვილებს. სანავიგაციო სისტემებსა და ციფრულ რუკებზე  გამოსახული  ბიზნესობიექტები ადგილობრივი და უცხოელი ტურისტებისთვის გაცილებით ცნობადი და იოლად მოსაძებნი გახდება,  რაც  ადგილობრივი ბიზნესის განვითარებას  შეუწყობს ხელს.

აღსანიშნავია,  საჯარო რეესტრი ინფორმაციას მსოფლიო ლიდერ სანავიგაციო კომპანიებსაც (Google, Tomtom) მიაწვდის, რომლებიც  მონაცემებს  თავიანთ პროდუქტებში: ელექტრონული რუკების მობილურ და ვებ აპლიკაციებში, ავტომობილების ბორტკომპიუტერებში, და სხვა სანავიგაციო სისტემებში ასახავენ.

საქართველო პირველია სამხრეთ კავკასიის რეგიონში, რომელიც მსოფლიო წამყვან სანავიგაციო სისტემებთან  ქვეყნის სივრცითი ინფორმაციის ინტეგრირებაზე მუშაობს და  ამ მიმართულებით აქტიურად თანამშრომლობს  გეოგრაფიული მონაცემების მწარმოებელ  კომპანიებთან.

ეროვნული სანავიგაციო სისტემის შექმნა და საქართველოს გეოგრაფიული მონაცემების  გლობალურ სანავიგაციო სისტემებში ინტეგრაცია საქართველოს მთავრობის ოთხპუნქტიანი გეგმის შესრულების ნაწილია. პროექტი ხელს შეუწყობს ქვეყნის პოპულარიზაციას, ეკონომიკური პოტენციალის გაუმჯობესებას, ინფრასტრუქტურისა და ქვეყანაში ტურიზმის  განვითარებას.

(NS)

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

კახა კალაძე: მჯერა, ჩვენი გმირების ბრძოლას უკვალოდ არ ჩაუვლია, ოკუპაცია დროებითია, სამშობლო კი მარადიული

გვარამია - პატივი მივაგოთ ჩვენს გმირებს და ხმამაღლა ვუთხრათ სამყაროს: სოხუმი საქართველოა! საქართველო ჩვენია! რუსეთი მტერია!

კობახიძე ამტკიცებს, რომ ტრამპს და რუბიოს ესაუბრა

კაცმა ფარულად შეაღწია საცხოვრებელ სახლში, ბლაგვი საგნით და ცივი იარაღით დაზიანებები მიაყენა თანასოფლელ, ხანდაზმულ ქალს, დანაშაულის ადგილს ცეცხლი წაუკიდა და მიიმალა - ქალი ადგილზე გარდაიცვალა