იზორია: კონგოში, საქართველოს მოქალაქის დასაცავად ყველაფერს ვაკეთებთ

2017-02-23 15:51:23, 1367 ნახვა

საზოგადოება

„კონგოში, საქართველოს მოქალაქის დასაცავად ყველაფერს ვაკეთებთ“,-ამის შესახებ თავდაცვის მინისტრმა ლევან იზორიამ კონგოს რესპუბლიკაში ამბოხებულების მიერ საქართველოს მოქალაქის ტყვედ აყვანასთან დაკავშირებით განაცხადა.

მინისტრის განმარტებით, საგარეო საქმეთა სამინისტრო კონგოს მთავრობას ეკონტაქტება და შესაბამისად, ინფორმაციის დეტალურად დამუშავება მიმდინარეობს.

„სამწუხაროდ, საქმე გვაქვს ამბოხებულებთან და შესაბამისად, ეს გარკვეულ სპეციფაკასთან არის დაკავშირებული. თუმცა მთავრობა არ იშურებს ძალღონეს,რომ საქართველოს მოქალაქის უფლებები დაცული იყოს,"-აღნიშნა იზორიამ.

ცნობისთვის, საგარეო საქმეთა სამინისტრომ დაადასტურა კონგოში ვერტმფრენის ჩამოგდების შესახებ ინფორმაცია, რომლის შედეგადაც მეამბოხეებმა საქართველოს ერთი მოქალაქე დაატყვევეს. ვერტმფრენის ჩამოგდების შედეგად, საქართველოს მეორე მოქალაქე დაიჭრა, თუმცა დაჭრილი პიროვნება აღმოსავლეთ კონგოს ქალაქ გომაშია გადაყვანილი, სადაც მას მკურნალობენ.

გავრცელებული ინფორმაციით, კონგოს სამხედრო ძალების ორი შვეულმფრენი მეამბოხეებმა 27 იანვარს ჩამოაგდეს, რომლიდან ერთ-ერთსაც საქართველოს მოქალაქე სოსო ოსურაული მართავდა. მეამბოხეებს ტყვედ სწორედ ის ჰყავთ აყვანილი და მის გამოსასყიდ თანხად მილიონ დოლარს ითხოვენ.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან